هرمل

هرمل

ملاحظة : الكلمة الصعبة عدوها ..كنت لسة قاري كتاب للجاحظ وخدتني الجلالة ..نبدأ..

كارثة أن يولد الانسان ويشيخ ويموت ..دون ان يترك وراءه ما يثبت انه قد عاش..
فا لعمل المثمر هو رسالتنا الكبري في هذه الحياة .. او يجب ان يكون كذلك..ونحن في هرمل نتظاهر اننا نعمل ..نصحو من النوم في الثامنة صباحا ونتوجه الي مكتب اميمة – مجرد اسمها بيخليني اقوم اكتب بدل راحة-ثم نقف في طوابير وبعد ان نوقع في دفتر الحضور والانصراف نتنفس الصعداء- والله باقراها في الكتب كده- فالواقع ان عملنا قد انتهي الي هذا الحد والباقي ليس الا تحصيل حاصل..
ارتداء البالطو والجلوس في العيادة وكتابة اموكسيل وبارامول ومذيب للبلغم مائة مرة او اكثر قليلا..وياويله اللي الدكتورة ليلي تلاقيه مش لابس البالطو..هى زغرة واحدة بس.. ثم نتساءل هل اتي عبد المنعم بالمرتبات ام لافي نهاية الشهر..
هذه هي الحياة في هرمل او الموت ان شئت الدقة..من المسئول عما نحن فيه؟؟
هل هو عبد الرحمن المدير – الثورة جمدت قلب الواحد قوي - ؟هل هو محمود يوسف نائب المدير؟هل هو عادل خليل النائب الاداري للمستشفي؟واين نحن من كل ذلك؟الواقع اننا رءوساءا ومرؤوسين لا نكف عن تبادل الاتهامات..بينما هرمل تغرق حتي وصلت الى ما هي فيه..احقر من ان تسمي وحدة صحية..واطبائها اتفه من ان يقال عنهم اطباء.. دعونا نتكلم بصراحة موجعة .. فلا وقت لدفن الرءوس في الرمال .. الخطوة الاولي للنهوض ان تعترف بانك قد وقعت..ولا يستطيع احد الادعاء بأنه ناجح بينما الاخرون فاشلون..الاغنية الناجحة قد تفشل بسبب سجارة دخنها المطرب قبل الصعود الي خشبة المسرح.. اقصد ان النجاح يحتاج الاهتمام بأدق التفاصيل..نجاح المستشفي يحتاج الي رؤية بعيدة النظر.. امن المستشفي له دور ..عمال النظافة لهم دور.. المسئول عن الكافتيريا له دور ايضا..لا بد ان يكون هناك هدف واحد وهو الارتقاء با لخدمة الطبية التى تقدمها المستشفي.. ولكن كيف يحدث هذا ونحن كأطباء نحتقر المرضي الراغبين في الخدمة..نحن نحتقرهم لأنهم فقراء .. ولأنهم جهلاء ..ولانهم في كثير من الاحيان يدعون المرض..لدرجة ان د. اشرف طه نائب الجراحة يري ضرورة إبادة هؤلاء البشر..ويقابل الكثيرون رأيه بالابتسام الصامت الذي هو علامة من علامات الرضا..والواقع ان احتقار الذات يؤدي الي احتقار الاخرين..والي الرغبة في التخلص منهم..ولعل طيبة اشرف ونقاء سريرته هي التي تجعله يعبر بوضوح عما يشعر..ولعلنا جميعا يراودنا هذا الاحساس الكريه..التخلص من المرضي والتخلص من الادارة والتخلص من المستشفي ..ولان هذا مستحيل فالكل يرغب في السفر وفي الهجره وفي الاستقالة من وزارة الصحة ..اقصد وزارة المرض..






2
د. مجدي ماهرأخصائى الجراحة شاب شديد الطموح وهو يحب القراءة في التاريخ وهو مهموم ايضا بحال البلد.. حكي لي ذات مرة أنه قبل ان يأتي الي مستشفي هرمل دخل الي نيبال – وكيل وزارة بالبكالوريوس – راجيا اياها ان يذهب الي مستشفي يستطيع ان يمارس فيها ما تعلمه ..واخبرها انه حاصل علي الماستر والزمالة المصرية .. يحكي لي كيف كان غضبها عاصفا وهي تقول له

يا دكتور احنا مش محتاجين منك غير دبلومه
اتفضل قوم شوف شغلك..

هذه امرأة لا تؤهلها دراستها ان تكون مديرة وحدة صحية استطاعت ان تكون وكيل وزارة ومرتبها يصل بالقانون الي عشرات الآلاف..ولكنها تعلم في قرارة نفسها انها لاتستحق ذلك ..لذا لاتحتمل ان تري انسانا يذكرها بفشلها.

ماذا يفعل د. مجدي في هرمل ؟ يشاهد العاشرة مساءا وتسعين دقيقة ومصر النهاردة
ويدخن ال إل إم ويأكل النفحات ويمضغ أحزانه واحزان البلد
3

الصورة في هرمل ليست بهذه السوداوية..فالشعب المصري قادر علي صنع افراحه الخاصة.. وهو ما يجعل الحياة محتملة ..فالضحك في هرمل لايتوقف والسخرية من وضعها المائل هو جوهر الاحاديث .فما اجتمع طبيبان إلاوكانت السخرية من هرمل ثالثهما..فهي مستشفي دار السلام بتنزانيا وأرمل وهرمفل ومستشفي الارامل والمطلقات والعوانس وهي مرحاض عام ومستشفي ام احمد والي ما لانهاية












4

لماذا نحب هرمل؟؟

- فطار الأربعاء
وهو عمل تطوعي يقوم به د.عادل امام اخصائى الجراحة والفطار عبارة عن طبق فول كبير وب4 جنيه طعمية و2 جنيه بطاطس و2 جنيه مسقعة و5 جنيه عيش
ولوحظ في الفترة الاخيرة اختفاء طبق الفول وهناك شائعات ان السبب في ذلك ان زبائن عيادة د. عادل قد تقلصوا بسبب ذهاب اشرف طه للعمل فيها
وشهد فطار الاربعاء ازدهاره في عهد خالد الذكر د.امام حيث كان يقوم باحضار الجبن والزبادي والمخللات وعلي اية حال فالفطار برغم تدنى مستواه الاانه مازال من الصور المضيئه في هرمل ويجعله عامر يا د. عادل

-النمرة علي طريقة نمرة السيرك
اللفظ من اختراع د. عادل والنمرة عبارة فول سودانى او بلح او سفندي اوموز او بليلة او رز باللبن يفاجئنا به د. عادل في نو بتجية الخميس من 2 الي 8
يا د.عادل بطل تعاملنا كقرود لو سمحت
-الباتيه ليلة الخميس
ويقوم د. عبده اخصائى الجراحة باحضاره وهو قادم الي النوبتجية في الساعة 11
مع العلم بانها تبدأ في 8 مساءا؟؟؟؟؟

-عشاء الجمعة
وهو عمل تطوعي يقوم به د. احمد سيد نائب الاطفال وهو في الحقيقة وجبة دسمة
ولايقل فخامة عن اي عشاء تأكله في اي مطعم فاخر
للعلم يفوق تمن العشاء تمن النوبتجية وهو 40 جنيه والعشاء قد يصل الي ضعف ذلك
سؤال
لماذا يحضر احمد سيد الي النو بتجية مع ان العملية واقفه عليه بخسارة؟؟

- عشاء الاربعاء
ومكوناته نفس مكونات فطار الاربعاء ولكن يحضره د. علي حجر اخصائى النسا والولادة وهو قادم الي النوبتجية في الساعة 11علما بانها تبدأفي 8


- مناقشات د.فوزى الديب الفلسفية
- شتائم د. حامد للنواب والتي لا يصح ان اذكرها
- قصص د. امام الشيقة الاجمل من حكايات الف ليلة وليلة
- قصص د. محمد ابو اليزيد العاطفية الاروع من افلام حسن الامام
- مغامرات د. اشرف طه العاطفيه
بيعرف بنات بيئة ..

- صراع عادل تخدير وماما نونة علي الوجبات وصلت الي رفع الشوم
- مايكل البهلوان الطبيب المثالي-فيه حرف زيادة في النص- وسهراته مع جورج وعلي حجر مافيش ضحك بعد كده
- ملاحظات د. احمد حمدي في دفتر الاحوال
هو اول من لاحظ البق في المراتب
هو اول من لاحظ ان المستوي البدني والثقافي لأمن المستشفي دون المستوي
-يوسف إليا شيخ النواب
- نوم الحديدي المتواصل
-

- اغاني الثلاثي اشرف طه ومحمدممدوح وانا والاغاني الذائعة الصيت
اصبر عليا لما استمخ - لاحظ كلامك – لعل وعسى – طب انا من ايدك ديه لايدك ديه – يتربي ف عزك يا حديدي – اوبريت هرمل



- الاسباب التي تجعلنا نحب هرمل اكبر من ان تحصي لذا اسأل السادة المشتركين في الجروب اقتراح اجوبة جديدة

















احداث مفرحة حدثت في هرمل مؤخرا

- حصول د. حسن علي نائب الجراحة علي الماستر من القصر العيني
- مناقشة مصطفي صلاح نائب الاطفال للرسالة
- مناقشة محمد ممدوح نائب الباطنة للرسالة
- خطوبة مصطفي صلاح بعد سنين من السرمحة وما حدش يفهم كلامى صح
- انجاب الحديدي لابنه يوسف اللي قرفان من الدنيا اكتر منه
- زواج ماجد نائب المبتسرين ومصطفي عبد الرحيم نائب بنك الدم هل ماتزال الرصاصة في جيبك يا درش؟؟؟
- خطوبة عادل تخدير بعد ان تجاوز ازمة طلاقه ..اللي طلقها كانت مخلصة ثانوية فقرر ياخد واحدة معاها اعدادية بالتوفيق يا عدول..ركز ..صعب تلاقي واحدة مخلصة ابتدائية
- اميمة ما عادتش مسئولة عن دفتر الحضور والانصراف بقت لبني
ماعدش حد ييجي المستشفي يا جماعة الدفتر في ايد امينة
- احمد حمدي بقي النائب الاداري بدل عادل خليل
- زواج د.محمد فتحى من د. هدي نائب المبتسرين ندعو لهما بالتوفيق
- رجوع د. خالد من السعودية
- انضمام بعض الشخصيات الجميلة الي هرمل مثل
محمد شاهين ثورجي ثورجي
وائل تخدير دماغ متكلفة

خالد جراحة شد حيلك يا خلود في المذاكرة اوعي تتعدي
محمد امين عشان خاطري ما تخافش م البوابين
ادهم سلامة خليتني احترم هرمل
مصطفي المصريين اهمة حيوية وعزم وهمة
ياسر عظام مسألة ضمير باحبك يا ستامونى
- المدير بقي بيشوفنا ويسلم علينا يا جدعان تحيا الثورة
- الحفلة الجميلة التي نظمتها د. اميرة لد. حامد قنديل بمناسبة تقاعده روح جميلة بجد .. كنتي فين من زمان يا د. اميرة الله عليكى
- د. ايهاب شاكر بقي مع الطليعة الشباب شباب الروح
- النواب هياخدوا في الاقتصادي مالوش لزمة السفر السعودية!!









الكائن الهرملي


هو كائن وحيد الخلية يتغذي علي اللحم البرازيلي كالقوارض وينام اكثر من الدب ولا يلد ولا يبيض كما ان جلده لايصلح لعمل شبشب بصابع
اوحزام من ابو اتنين جنيه ونص وعندما تشتد الحرارة يرفض التحرك الي الضل الا بعلقة وجاء في الاثر ان من علامات الساعة ظهور هذا الكائن الذي لانفع فيه ولا امل منه ...وقال بعض المفسرين ان هذا الكائن اللعين هو المسيخ الدجال الذي يفتن الناس ويغريهم بالانتخة والتفخيد وبذلك تفسد دنياهم وآخرتهم ويتميز هذا الكائن انه يهرم بسرعة عجيبة وتجده وهو في عز شبابه لا حيوية فيه ولاشىء يرضيه الا اشاعة الوهن والتراخى والكسل فيمن حوله ولا تجده متحمسا الا وقت الاكل والنوم وقضاء الحاجة ولعب الطاولة وفيما عدا ذلك فهو كاره للحياة ناقم عليها مستهزىء بالذين يحبونها والراغبين في الاستزادة من مباهجها
لذا أوصيكم يا عباد الله ان تفروا منه كما تفرون من الاسد بل هو اشد لعنة من الاسد لان الاسد يقضي عليك مرة واحدة اما هذا الكائن اللعين فيقتلك قتلا بطيئا وتفاجأ انك اصبحت بعد طول معاشرته كائنا ممسوخا مثله هذا والله ورسوله أعلم




















علامات مضيئة في تاريخ هرمل

د. محمد إسماعيل باطنه

الرجل الذي حارب من اجل إدخال الأمبو مستشفي هرمل
ولكنه فشل
صاحب مقولة احترمى معدتك زى ما بتحترمي عينك
صاحب السؤال الاشهر يا تري عش العصفورة يكفينا
وهو الذي قال عيب ان الناس الكبيرة تشرب لبن.. اللبن للأطفال فقط
يحب النجارة اكثر من الطب

د. عبد العزيز البقري عظام

الاقطاعي
عدو ثورة 52
صاحب الصيحة المدوية عايزني ألحد يعني عايزنى ألحد ردا علي فهمي العلماني الذي كان يحاول زعزعة عقيدته


د. عبد الحليم جراحة
صاحب الابحاث العلمية في مجال القدم السكري
عدو البيتادين
كان يغرد خارج السرب تماما

د. مريد
طبيب الجراحة الذي استطاع ان يصل لمستوي اساتذة الجامعة
اللي عايز يمسك نجوم السما ماحدش هيحوشه
كما يقول المتنبي
اذا غامرت في شرف مروم فلا تقنع بما دون النجوم
فطعم الموت في امر حقير كطعم الموت في امر عظيم


علي فكرة د.مريد اشتغل في هرمل 6 شهور اخد 300جزا؟؟؟
رغم التزامه ورغبته الشديدة في العمل
انجح وسط الفشلة وهتلاقيك اكتر انسان مكروه لكن دع الكلاب تعوي
لايصح الا الصحيح



د.امام
موسوعة ثقافية
انسان لاتمل من احاديثه وإلمامه بالمعلومات الدينية والتاريخية والادبية
اب بكل معني الكلمة
من المؤسف ان يقضي انسان بهذا الاقتدار معظم حياته خارج مصربحثا عن عيشة كريمة وعايزين حسنى مبارك يدخل التاريخ ؟؟ في مزبلته ان شاء الله

د. رفيق مبتسرين
انسان يملك من العلم ومن الكاريزما ومن حسن الادارة ما يجعله وكيل وزارة علي اضعف تقدير ولكن لم يكن الا رئيس قسم في مستشفي هرمل ونيبال وكيل وزارة الله يجحمك يا حسني مطرح ما غرت قولوا آمين

د. محمد جمعة جراحة
منه اتعلمنا حاجات كتير في قانون العاملين بالدولة
كنا اجبن من اننا نسمع كلامه
رسالتك وصلت يا جمعة .. سلم علي ناس العريش وعايزين نشوفك
فاكر نظريتك عن المؤامرة التي تحاك ضد هرمل


د. اشرف الملوك
صاحبة براءة اختراع بدلة حروق .. اتنشر عنها في المصري اليوم


د. رامي تخدير

إله السكن الذي كان يقوم تطوعا بالاشراف علي السكن ونظافته
وتعسف الادارة جعله يذهب بغير رجعة
ارجع يا رامي محتاجينك






د.حسن جنيدي

راح يفجر نفسه في افغانستان ..اللهم لا ترزقه الشهادة..عشان مصر فيها بنات بايرة كتير مين هيسترهم غيرك يا حسانوف


د. عماد عبد الجواد
اخو البنات
مش هتسترجل يا عمدة؟؟

د. احمد التابعي
الشاب اللي حط بولاق الدكرور ع الخريطة
صانع البهجة
بس لو يبطل يفضح البنات اللي بيمشي معاههم
اخبار البللي رنج ايه يا تابعي؟؟؟


جون تخدير
يكتئب لو لقي نفسه مش مكتئب
اكيد ماتفرجش علي اسماعيل ياسين وهو صغير انصحك بالاستماع لاغنية فريد الحياة حلوة
عارف هتكتئب اكتر
طب ايه رأيك وديع الصافي دار يا دار
لذيذ يا جون وانت مكتئب
ارجوك اثبت علي موقفك





هيثم الحداد

الدنيا طبيخ والجو فشيخ
قفل علي كل البطاريخ قفل قفل قفل رغم غيابك يا هيثم تظل علامة من علامات هرمل

عبد الرحمن الممرض شهيد هرمل
مسافر الصعيد عشان يتجوز .....العربية عملت حادثة ومات
الله يرحمك يا عبده..الحق توب يااشرف ياطه

اسلام مدبولي

الشاب اللي حلم حياته يبقي هندي احمر
وجودك كان مهم ياسوسو
من يو م ما مشيت واحنا بقين مؤدبين
ارجع ارجوك
A7A
اشرف طه حسين
عميد قلة الادب العربي
لماذا خلق الله النساء؟؟



مصطفي رأفت
الليلة الكبيرة
كل الناس بتسأل عليك يا درش فينك؟؟

د. عبد الراضي
اسم علي غير مسمي
اتجوزت ولا لسة ياد؟؟؟

25 يناير

25يناير

حكمة بيقولها الزمان

إرمي قلبك

في الميدان

يصنع دواير

م القلوب

حكمة بيقولها يناير

كاس وداير

ع الطغاة

غضب الشعوب

راح زمان الدم الازرق

مين يصدق

مصر تصحي من مماتها

تفتح ستاير أمنياتها للنهار

تغسل رئاتها

م الغبار

والصديد

تاخد بإيد

كل حلم مالوش جناح

تاخد بخاطر

كل دمعة

فوق جراح الأمهات

مصر طالع فيها جيل

عنده قدرة

يبني تاني

أهرامات

يقدر يعمر

يقدر يخضر

كل شبر ف أرض سينا

يقدر ينور ليل ماضينا

أيام ما كانت كل مينا

دايما تنام

يائسة وحزينة

ع الورد رايح

يركب سفينة

من ورق كرتون

ياللا خير

الفجر شقشق

والطير خلاص

يقدر يزقزق

ع الغصون

يارب بارك

واحفظ وصون

ثورة يناير

م الافاعي

والشعب يفضل

ثاير وواعي

باللي صالح

واللي طالح

واللي ساهي

واللي عايز

مصر تعلي

واللي عايز

مصر تفضل زى ماهي

يامصرفيكى شىء إلهي

خلى شبابك

عايز يموت

حاضن ترابك

ف الميدان

واللي كان

خلي الجيران

يا مصر تعرف إنتي مين

وهتبقي أيه

خلي الزمان

يقف انتباه

والدنيا تسأل ألف ليه

مصر ليه

دايما بتصحي من مماتها

تفتح ستاير أمنياتها للنهار

د. محمد فهمى

رساله وداع للرئيس

رسالة وداع إلي الرئيس            شعر د/ محمد فهمى

ليل طويل

فوقه بتحوم الطيور

عطشانة مية سلسبيل

عطشانة نور

عايزة تشرب

عايزة تحضن

كل مركب فيك يا نيل

عايزة تزرع

ألف شجرة ع الجسور

عايزة تبني ألف بيت

بس خايفة

وهي شايفة

الصبح غيط

ومحاوطه سور

مكهرب

وما عدش مهرب

م الهلاك

إلا الصدام

والتحدي

والتصدي

لأشباح الضلام والقبور

النسر خاف

والنعام

غطى راسه باللحاف

لحظتها قام

عصفور جسور

قال هاثور

مش هافضل ابكي

هارمى خوفي

هارمى قهري

خلف ضهري

واقول لدهري

هاعيش حياتى

بكرة ملكى

ونهرى ملكى

وأغنياتى

سيف في قلب الديناصور

بكرة آتى

لا محالة

واستحالة

تبقوا فيه

إنتوا ليه

عايشين في مصر

وانتو اصلا مش ولادها

مصر ناسها طيبين

زى نيلها

وطمي نيلها

وسحر ليلها في الحسين

مصر قمح وقطن طارح ع الجبين

مصر شعر صلاح جاهين

والفاجومى

وانت فين من همومى

من هوانى ع العباد

من ضياعي ف البلاد

م الفساد

اللي صار أكسجين

احنا مين؟؟؟؟

إحنا جيل بوجى وطمطم

إحنا جيل عمو فؤاد

إحنا نن الضي في عيون الرماد

إحنا أحمد

إحنا مينا

إحنا اللي بقلوبنا بكينا

يوم ما مات لك حفيد

إحنا اللي مات مننا امبارح

ميتين شهيد

وما زعلتش علينا

ما علينا

انتهينا

وداع يا ريس

نصيحة الاخت ميادة

نصيحة الاخت ميادة

ياااااااااه

ماتغيرتش خالص

نفس الضحكة

نفس الصوت

نفس اللمعان اللي ف عينك

وهدومك نفس الالوان

أزرق

كحلي

سماوي

والله زمان يا محمد!!

أخبارك

فينك دلوقت

لساك بتحب الشغر

لساك مجنون

كل قصايدك عندي

حافظاها

بتفكرني بأجمل أيام ف حياتي

بالسيما

بالمشاية

بطب المنصورة

بالضحكة بتاعتك

جوزي

زى حالاتك وحالاتى

دكتور

تخدير

طيب جدا وف حاله

ودا عيبه وميزته ف نقس الوقت

أهلاوى

علمنى أتفرج ع الماتشات

وكمان علمنى العب طاولة

نخرج مين يابني إنت عبيط

حد بيخرج ويا مراته

لأ

مابيقراش غير أهرام الجمعة

بس ساعات بيحل الكلمات المتقاطعة

عندي محمد

لاسع زيك

ونادين

عقبالك

م الحق معايا صورهم ف الشنطة

اعقل واتجوز

سيبك من أفكار العقاد وأنيس منصور

دا يودوا ف داهية

لازم نمشي زى الناس ماهي ماشية

لأ

مش مبسوطة يا سيدي

لو فكرت للحظة ف حالي

هاخرب بيتي بإيدي

بطلت اسمع فيروز ومنير

بطلت اقرا نزار وجويدة

بطلت اعمل كل اللي باحبه

البيت أولي بتمن الجرنان

ياااااااه

الوقت سرقنا

كان نفسي اتكلم وياك للصبح

ها ستأذن

كلمة أخيرة من أختك ميادة

اعقل واتجوز

أمتع شئ ف الدنيا إن يكون عندك أولاد

واختار أساميهم انت بنفسك

طول عمرك شكاك

عارفاك

نمرة تلفونى معاك

إياك تتكلم

تنبيه:جميع الحقوق محفوظه دكتور محمد فهمى

نفسي

نفسي

نفسي لما الشعر أقوله

يقع الهوي من طوله

والبدر أطوله

والمجد أنوله

زي عطر السوسنه

وتدوب قلوب كل الصبايا

ويصير غنايا فوق شفايف كل عاشق دندنه

ويصير بكايا كاس سعادة

يشربه كل دامع بالهنا

ويصيرصديق للوحيد

ونقطة نور

نفسي لما الشعر أقوله

الكلام يطرح زتون

ويطير حمام بين السطور

وتصير كراسي السادة الحضور

أشجار ربيع

وتتفجر الينابيع من السجاد

ويسقف نزار قباني

ويهتف فؤاد حداد

وترقص عقود الماس علي صدور الزهور

وتسكر كاسات الحنين

والناس تقول

قلت يابني

كل اللي كان نفسنا نقوله ومش عارفين

تنبيه: جميع الحقوق محفوظه دكتور محمد فهمى

عادل اليا

عادل إليا

لوشفته تقول

إنسان غلبان علي باب الله

مش دكتور

دقنه

لبسه

نضارته

والمشية بتاعته

مشية ناي مكسور

والطقم بيفضل لابسه ييجي ست شهور

دايما ماشي بكيس متكرمش

حاطط فيه السماعة وجهاز الضغط

والآكل والآدوية

ماتجبلك شنطة يا عادل

أحسن من أم الكيس ده

يضحك

 ما يردش

ويولع ف سجاره

طب خد منديل امسح أم النضاره

يضحك

 ما يردش

ويولع ف سجاره

واعرف م الناس

إن باباه كان أستاذ دكتور ف القصر العينى

جده كان باشا وإقطاعى كبير ووزير

ف وزارة أحمد ماهر

واعرف منه إنه عايش مع أخته واخوه

ف المنيل

ذات مرة

رحت معاه البيت

الفيلا اللى ساكنها

ايه ف فن المعمار

كل جدار ساند ع التاني بحب

والسقف تحس بإنه مش موجود

منك للسما علي طول

والصالة ترمح فيها خيول

والشبابيك

بتطل علي نهاربيزقزق طول الليل

بالنهر الخالد والجندول

ذات مرة

ونا قاعد مخنوق

طبطب علي كتفي وقاللى بصوت

هو الحنية بذاتها

ما تخيبش الخيبة بتاعتى

قرر من دلوقت

عايز الطب ولا كتابة الاشعار

أنا شايف إنك موهوب

لكن محتار

الحق نفسك

واجمع خطاويك وارميها ف نفس المشوار

ماتخيبش الخيبة بتاعتى

كوكو ابن اختى

هو اللى مخلينى أعيش أيامي الباقية

هو الياسمينة اللى بتكبر قدامى

هو الساقية اللى بتروى عروقى الدبلانة

لما بيركب فوق ضهرى

ونسافر للنجم العالى

الضغط بيتظبط من غير برشام

والروماتيزم

بيحاول يوجعنى بعزم ما فيه

ما بيقدرش

اتجوز يا محمد

قبل العمر ما يسرق

عناقيد النور اللى ف وشك

قبل ما يخنق كتاكيتك

أنا حبيتك علشان إنت صريح

ما بتعرفش اللف ولا الدوران

عامل صايع

لكن من جواك غلبان وخجول

زيى زمان

وعرفت بنات

أكتر م اللى انت عارفهم بكتير

واجمل بمراحل

وكمان كان عندي الشقة والعربية

والجيب عمران

كان عادل إليا جان طب القصر العينى زمان

كان عندي فضول

وقريت في جميع الآديان

وقريت القرآن

 حبيت سيدنا محمد حب عبادة

حبيت بوذا وكونفشيوس

وكفرت بدين

 وآمنت بكل الأديان

لكن لانضميت لجماعة االإخوان ولا حاجه

كل الفكرة

كان عندي فضول

أعرف أفكارهم أيه

وف مرة ونا وياهم

طبوا علينا بتوع أمن الدولة واعتقلونا

ياجماعة

أنا عادل إليا مسيحى

وكأنى بانادي ف مالطة

وبسببى

ماما

ماتت بالجلطة

كانت أيام الله لايعيدها

دلوقتى إحنا ف نعمة

الواحد يقدر يتكلم

من غير ما يخاف زى زمان

دولا

إوعى تكون بتضايقك أسئلتى

أبدا

بطلت أزعل من كتر الا حزان

هاعمل شاي

أعملك ويايا

عمرك أطول من عمرى

أنا فعلا خرمان

دولا

ليك هوايات

باعمل شوبنج

مش معقول

عمري ما شفتك جايب حاجه جديده

لأ

مانا باشترى شرابات

دمك زى الشربات

إمبارح واحنا بنمضى قابلته

دولا

إزيك

فينك من أسبوع

أخويا ياسيدي

كان بيهد البيت

قالها بدون مبالاة

وانا عارف إنه بيتقطع من جواه

طبطبت عليه

وحضنته

فرت من عينه دمعة وحيدة

مسحها بسرعة

شد سجارة من العلبة البوكس

حاول إنه يولعها كذا مرة

يطفي الكبريت قبل ما تولع

إيده بترعش

فرت من عينى كذادمعة

وبحزن شديد

قمت ناولته الولاعة

ولعت

لكن وقعت من بقه ع الارض

طلعت من الكيس المحطوط علي حجره

السماعة

حطيتها علي صدره

ما سمعتش نبض لكن فجأه

اتكلم

علي فكره

مش اول مرة أموت

أنا مت كتير وصحيت

تنبيه: جميع الحقوق محفوظه للناشر دكتور محمد فهمى 

قصيدة كان عمرى 16 ربيع

كان عمرى ستاشر ربيع

كان عمرى ستاشر ربيع

لما بست بنت الجيران

بوسة

لسه ف شفايفي طعمها

والبنت قالت لامهاوكانت فضيحه

ابويا لمها

بس من يومها بقيت مهووس

يعني اموت

لو مر يوم

من غير ما ابوس

كان عمرى ستاشر ربيع

لما دخنت أول سجاره ف الحمام

أجمل سجاره شربتها

والريحه ابويا شمها

وخدت علقة ما نسهاش

وعرفت يومها البيتادين والشاش

بس ما عرفتش أو جايز عرفت

إنى هاكون دكتور

رغم أنى ما ليش ف العلم

يا هل ترى الصدفة بتلعب دور

ولا هى اللى كاتبه كل الفيلم

كان عمرى ستاشر ربيع

لما قريت أول ديوان

وركبت مركب ورق

وسافرت بلاد بعيده

واصطدت أول قصيده

من كف بنت اسمها مياده

من يومين كنت قاعد ف العياده

ولقيتها داخله بابنها

وف عينها كحل الذكريات

تخنت واوحشت جدا

زى كل الامهات

بس لسه باحبها

لسه شايف إنها ست البنات

كان عمرى ستاشر ربيع

لما ابتدى ظهورى ف الجامع يقل

وفجورى يزيد

كل الكلام ف خطبة الجمعة ممل

عايز جديد

وعرفت ماركس

وصاحبت سارتر

وعشقت نيتشة

وكرهت هتلر

وعجبنى خالد بن الوليد

كان عمرى ستاشر ربيع

لما ابتديت أنى افكر تفكير شيطانى

واسأل أسئله مالهاش إجابه

واكره كل أشكال الرقابه

كان نفسى ف طبيب نفسانى

يديني جلسة كهربا

الشعر أيه

لعنه ولا موهبه

والدنيا أيه

غابه ولا طيبه

والشمس رغم البعد باينه قريبه ليه

والبنت لما تحب

سافله ولا مؤدبه

كان عمرى ستاشر ربيع

لما ابتديت أعشق السيما بجنون

واعشق قعدة القهوة بجنون

واخلق لنفسى دنيا تانيه

وكون تانى

واملا كشكول المذاكره

بالأغانى العاطفية

واظهر بالهدوم الداخليه ف البلكون

واتلصص على صدر جارتى لما تنشر ف الغسيل

واعشق كوبري قصر النيل

وارفع على الاخر صوت الراديو والتسجيل

واسرق فلوس الدروس

واسهر أبوس ف المخدة

واغنى ويا كاظم يا مستبدة

وويا فؤاد الحب الحقيقي

ويبقي صديقى هديل بنت حلوه ف التلفون

والفاتورة تقسم ضهر أبويا كل ست شهور

ألف رحمة ونور عليه

مات محسور

وارجع كل يوم البيت بعد نص الليل

بس انام بعد ما اسمع للمحاضره

واكره أي حد يقوللي ذاكر

مستقبللك هيضيع

والبس سلسله وإنسيال

وجينز ضيق

وشوز توكيل

واعمل مشكلة ويا امى لو تشيل

أي حاجة تخصنى من مكانها

واكره دلعها

واكره حنانها

واعمل كبير

واكره أبويا لآنه فقير

واحلم إنى صرت م المشاهير

والزق بوستراتهم ع الحيطان

كنت حافظ كل إفيه قاله هنيدي ف صعيدي

لما كان عمري ستاشر ربيع

قصيدة أبويا

                                             

أبويا

ماعرفتش قيمته غير بعد ما مات

غير بعد الوقت ما فات بكتير

ما  سمعتش صوته

غير بعد ما بطل ينده

ع الورده الدبلانه ف قلب أجنده عبير أطلاله

كان طيب جدا وف حاله

إن يضحك

الفجر النايم يصحى له

والصبح يشقشق

وتزقزق عصافير

وتطير فراشات حواليه

ما بكيتش عليه

واشتقت إليه

غير بعد ما فات علي ذكري رحيله

صيفين واربع أعياد

ما وقفتش علي روحه حداد

غير بعد ما سافر قلبي بلاد الحزن وعاد

مكسور الجناحين

غير بعد ما شفت ديابه تحت جلود البني ادمين

مش كنت تقول يا با

إن الغابه أرحم من غدر الا صحاب

مش كنت تشد وراك الباب

بعدك يابا

مت من البرد وم الرعد وم الريح

وغرقت ف دمع التماسيح

ملايين المرات

مش كنت تسيب

تواشيح الفجر فريح

أمسيات أحزانى

مش كنت تقول يابا

إنك رايح مش راجع تانى

مش كنت تسيب

حضنك مبكى لأوجاعى

أو ضهرك عكاز لدراعى

من غيرك يابا

الدنيا ما فيش داعى أعيشها

من غير ريشها العصفورة تطير إزاى

من غير الناى

الراعى يموت

كان هادى الاعصاب و بيعشق عبد الوهاب

ويغنى معاه خى

وف كل صلاه

واقف ف الصف الاول زى المشكاه

كان جدول حنيه

كان دايما يلبس جلابيه وطاقيه شبيكي

كان أجمل وقت

لما اشرب كوباية شاى وياه ف البلكونة

في ليلة صيف

عمري ما حسيت بالحر غير بعد ما مات

وكأن وجود الاب ف قلب البيت تكييف

كان يطبخ أحسن من امهر شيف

كان يفتح حق التونة من غير سكينة

كان دايما يحكي عن أيام الجيش

أجمل أيام في حياته

بعد اصحابه ما ماتوا ما قدرش يعيش

فاكر يابا

ولا نسيت علي غير العاده

حتي نسيت فوق الكومودينو ومت

العيش الفينو

طبق الفول

قرطاس الطعمية ابو نص جنيه

فنجان القهوه الساده

كيس الادويه

السبحة

المصحف

الراديو

الجرنان

وسجارة الكيلوباترة الوالعة ف قلب الطفاية

والشمس الطالعة تصبح على شيش شباكك

فينك يابا وفين اراضيك

أخبارك أيه؟

يعني ما حدش شافك من سنتين

كل ماارن عليك بتكنسل ليه

مابتسألش علينا

قلت اطلع أجدع منك واسأل

إحنا تمام

بس الايام من غيرك

مش ايام

طبعا خلصت علام

وبقيت دكتور زى ما كنت بتحلم

اتخصصت ف طب الباطنة

لأ

ما فتحتش لسه عياده

لأ

ما اتجوزتش لسه

لما انوى أكيد هتكون أول واحد يعرف

ابا

قول انك بتهزر

ممكن ما تجيش إزاي

قسما بالله مانا متجوز من غيرك

علي رأيك

وقتها تفرج

ماشي الحال

مستوره وعال

شايلك لكبيره

قدها وقدود

ربنا موجود

شغال دالوقت ف مصر

في الملك الصالح

بعد السيدة زينب علي طول

من غير ماتقول

والله بازورها

وباصلى الجمعة ف جامع عمرو

لأ

ما عقلتش

لكن مش عايزك تزعل منى

غصبن عنى

مش عارف أبطل تدخين

وقرايه وكتابة شعر وسيما

مش عارف أوفر قرشين

مش عارف أشيل حب النسوان من دمى

أمى بخير

واختى بخير

كنا ف سيرتك لسه امبارح باليل

ماشي خلاص

خالى السيد سلملى عليه

عارفك مستعجل ليه

بس اهدى شويه

قلبك تعبان

لتموت تانى