أبويا
ماعرفتش قيمته غير بعد مامات
غير بعد الوقت ما فات بكتير
ما سمعتش صوته
غير بعد ما بطل ينده
ع الورده الدبلانه ف قلب أجنده عبير أطلاله
كان طيب جدا وف حاله
إن يضحك
الفجر النايم يصحى له
والصبح يشقشق
وتزقزق عصافير
وتطير فراشات حواليه
ما بكيتش عليه
واشتقت إليه
غير بعد ما فات علي ذكري رحيله
صيفين واربع أعياد
ما وقفتش علي روحه حداد
غير بعد ما سافر قلبي بلاد الحزن وعاد
مكسور الجناحين
غير بعد ما شفت ديابه تحت جلود البني ادمين
مش كنت تقول يا با
إن الغابه أرحم من غدر الا صحاب
مش كنت تشد وراك الباب
بعدك يابا
مت من البرد وم الرعد وم الريح
وغرقت ف دمع التماسيح
ملايين المرات
مش كنت تسيب
تواشيح الفجر فريح
أمسيات أحزانى
مش كنت تقول يابا
إنك رايح مش راجع تانى
مش كنت تسيب
حضنك مبكى لأوجاعى
أو ضهرك عكاز لدراعى
من غيرك يابا
الدنيا ما فيش داعى أعيشها
من غير ريشها العصفورة تطير إزاى
من غير الناى
الراعى يموت
كان هادى الاعصاب و بيعشق عبد الوهاب
ويغنى معاه خى
وف كل صلاه
واقف ف الصف الاول زى المشكاه
كان جدول حنيه
كان دايما يلبس جلابيه وطاقيه شبيكي
كان أجمل وقت
لما اشرب كوباية شاى وياه ف البلكونة
في ليلة صيف
عمري ما حسيت بالحر غير بعد ما مات
وكأن وجود الاب ف قلب البيت تكييف
كان يطبخ أحسن من امهر شيف
كان يفتح حق التونة من غير سكينة
كان دايما يحكي عن أيام الجيش
أجمل أيام في حياته
بعد اصحابه ما ماتوا ما قدرش يعيش
فاكر يابا
ولا نسيت علي غير العاده
حتي نسيت فوق الكومودينو ومت
العيش الفينو
طبق الفول
قرطاس الطعمية ابو نص جنيه
فنجان القهوه الساده
كيس الادويه
السبحة
المصحف
الراديو
الجرنان
وسجارة الكيلوباترة الوالعة ف قلب الطفاية
والشمس الطالعة تصبح على شيش شباكك
فينك يابا وفين اراضيك
أخبارك أيه؟
يعني ما حدش شافك من سنتين
كل ماارن عليك بتكنسل ليه
مابتسألش علينا
قلت اطلع أجدع منك واسأل
إحنا تمام
بس الايام من غيرك
مش ايام
طبعا خلصت علام
وبقيت دكتور زى ما كنت بتحلم
اتخصصت ف طب الباطنة
لأ
ما فتحتش لسه عياده
لأ
ما اتجوزتش لسه
لما انوى أكيد هتكون أول واحد يعرف
ابا
قول انك بتهزر
ممكن ما تجيش إزاي
قسما بالله مانا متجوز من غيرك
علي رأيك
وقتها تفرج
ماشي الحال
مستوره وعال
شايلك لكبيره
قدها وقدود
ربنا موجود
شغال دالوقت ف مصر
في الملك الصالح
بعد السيدة زينب علي طول
من غير ماتقول
والله بازورها
وباصلى الجمعة ف جامع عمرو
لأ
ما عقلتش
لكن مش عايزك تزعل منى
غصبن عنى
مش عارف أبطل تدخين
وقرايه وكتابة شعر وسيما
مش عارف أوفر قرشين
مش عارف أشيل حب النسوان من دمى
أمى بخير
واختى بخير
كنا ف سيرتك لسه امبارح باليل
ماشي خلاص
خالى السيد سلملى عليه
عارفك مستعجل ليه
بس اهدى شويه
قلبك تعبان
لتموت تانى
كان عمرى ستاشر ربيع
كان عمرى ستاشر ربيع
لما بست بنت الجيران
بوسة
لسه ف شفايفي طعمها
والبنت قالت لامهاوكانت فضيحه
ابويا لمها
بس من يومها بقيت مهووس
يعني اموت
لو مر يوم
من غير ما ابوس
كان عمرى ستاشر ربيع
لما دخنت أول سجاره ف الحمام
أجمل سجاره شربتها
والريحه ابويا شمها
وخدت علقة ما نسهاش
وعرفت يومها البيتادين والشاش
بس ما عرفتش أو جايز عرفت
إنى هاكون دكتور
رغم أنى ما ليش ف العلم
يا هل ترى الصدفة بتلعب دور
ولا هى اللى كاتبه كل الفيلم
كان عمرى ستاشر ربيع
لما قريت أول ديوان
وركبت مركب ورق
وسافرت بلاد بعيده
واصطدت أول قصيده
من كف بنت اسمها مياده
من يومين كنت قاعد ف العياده
ولقيتها داخله بابنها
وف عينها كحل الذكريات
تخنت واوحشت جدا
زى كل الامهات
بس لسه باحبها
لسه شايف إنها ست البنات
كان عمرى ستاشر ربيع
لما ابتدى ظهورى ف الجامع يقل
وفجورى يزيد
كل الكلام ف خطبة الجمعة ممل
عايز جديد
وعرفت ماركس
وصاحبت سارتر
وعشقت نيتشة
وكرهت هتلر
وعجبنى خالد بن الوليد
كان عمرى ستاشر ربيع
لما ابتديت أنى افكر تفكير شيطانى
واسأل أسئله مالهاش إجابه
واكره كل أشكال الرقابه
كان نفسى ف طبيب نفسانى
يديني جلسة كهربا
الشعر أيه
لعنه ولا موهبه
والدنيا أيه
غابه ولا طيبه
والشمس رغم البعد باينه قريبه ليه
والبنت لما تحب
سافله ولا مؤدبه
كان عمرى ستاشر ربيع
لما ابتديت أعشق السيما بجنون
واعشق قعدة القهوة بجنون
واخلق لنفسى دنيا تانيه
وكون تانى
واملا كشكول المذاكره
بالأغانى العاطفية
واظهر بالهدوم الداخليه ف البلكون
واتلصص على صدر جارتى لما تنشر ف الغسيل
واعشق كوبري قصر النيل
وارفع على الاخر صوت الراديو والتسجيل
واسرق فلوس الدروس
واسهر أبوس ف المخدة
واغنى ويا كاظم يا مستبدة
وويا فؤاد الحب الحقيقي
ويبقي صديقى هديل بنت حلوه ف التلفون
والفاتورة تقسم ضهر أبويا كل ست شهور
ألف رحمة ونور عليه
مات محسور
وارجع كل يوم البيت بعد نص الليل
بس انام بعد ما اسمع للمحاضره
واكره أي حد يقوللي ذاكر
مستقبللك هيضيع
والبس سلسله وإنسيال
وجينز ضيق
وشوز توكيل
واعمل مشكلة ويا امى لو تشيل
أي حاجة تخصنى من مكانها
واكره دلعها
واكره حنانها
واعمل كبير
واكره أبويا لآنه فقير
واحلم إنى صرت م المشاهير
والزق بوستراتهم ع الحيطان
كنت حافظ كل إفيه قاله هنيدي ف صعيدي
لما كان عمري ستاشر ربيع
عادل إليا
لوشفته تقول
إنسان غلبان علي باب الله
مش دكتور
دقنه
لبسه
نضارته
والمشية بتاعته
مشية ناي مكسور
والطقم بيفضل لابسه ييجي ست شهور
دايما ماشي بكيس متكرمش
حاطط فيه السماعة وجهاز الضغط
والآكل والآدوية
ماتجبلك شنطة يا عادل
أحسن من أم الكيس ده
يضحك
ما يردش
ويولع ف سجاره
طب خد منديل امسح أم النضاره
يضحك
ما يردش
ويولع ف سجاره
واعرف م الناس
إن باباه كان أستاذ دكتور ف القصر العينى
جده كان باشا وإقطاعى كبير ووزير
ف وزارة أحمد ماهر
واعرف منه إنه عايش مع أخته واخوه
ف المنيل
ذات مرة
رحت معاه البيت
الفيلا اللى ساكنها
ايه ف فن المعمار
كل جدار ساند ع التاني بحب
والسقف تحس بإنه مش موجود
منك للسما علي طول
والصالة ترمح فيها خيول
والشبابيك
بتطل علي نهاربيزقزق طول الليل
بالنهر الخالد والجندول
ذات مرة
ونا قاعد مخنوق
طبطب علي كتفي وقاللى بصوت
هو الحنية بذاتها
ما تخيبش الخيبة بتاعتى
قرر من دلوقت
عايز الطب ولا كتابة الاشعار
أنا شايف إنك موهوب
لكن محتار
الحق نفسك
واجمع خطاويك وارميها ف نفس المشوار
ماتخيبش الخيبة بتاعتى
كوكو ابن اختى
هو اللى مخلينى أعيش أيامي الباقية
هو الياسمينة اللى بتكبر قدامى
هو الساقية اللى بتروى عروقى الدبلانة
لما بيركب فوق ضهرى
ونسافر للنجم العالى
الضغط بيتظبط من غير برشام
والروماتيزم
بيحاول يوجعنى بعزم ما فيه
ما بيقدرش
اتجوز يا محمد
قبل العمر ما يسرق
عناقيد النور اللى ف وشك
قبل ما يخنق كتاكيتك
أنا حبيتك علشان إنت صريح
ما بتعرفش اللف ولا الدوران
عامل صايع
لكن من جواك غلبان وخجول
زيى زمان
وعرفت بنات
أكتر م اللى انت عارفهم بكتير
واجمل بمراحل
وكمان كان عندي الشقة والعربية
والجيب عمران
كان عادل إليا جان طب القصر العينى زمان
كان عندي فضول
وقريت في جميع الآديان
وقريت القرآن
حبيت سيدنا محمد حب عبادة
حبيت بوذا وكونفشيوس
وكفرت بدين
وآمنت بكل الأديان
لكن لانضميت لجماعة االإخوان ولا حاجه
كل الفكرة
كان عندي فضول
أعرف أفكارهم أيه
وف مرة ونا وياهم
طبوا علينا بتوع أمن الدولة واعتقلونا
ياجماعة
أنا عادل إليا مسيحى
وكأنى بانادي ف مالطة
وبسببى
ماما
ماتت بالجلطة
كانت أيام الله لايعيدها
دلوقتى إحنا ف نعمة
الواحد يقدر يتكلم
من غير ما يخاف زى زمان
دولا
إوعى تكون بتضايقك أسئلتى
أبدا
بطلت أزعل من كتر الا حزان
هاعمل شاي
أعملك ويايا
عمرك أطول من عمرى
أنا فعلا خرمان
دولا
ليك هوايات
باعمل شوبنج
مش معقول
عمري ما شفتك جايب حاجه جديده
لأ
مانا باشترى شرابات
دمك زى الشربات
إمبارح واحنا بنمضى قابلته
دولا
إزيك
فينك من أسبوع
أخويا ياسيدي
كان بيهد البيت
قالها بدون مبالاة
وانا عارف إنه بيتقطع من جواه
طبطبت عليه
وحضنته
فرت من عينه دمعة وحيدة
مسحها بسرعة
شد سجارة من العلبة البوكس
حاول إنه يولعها كذا مرة
يطفي الكبريت قبل ما تولع
إيده بترعش
فرت من عينى كذادمعة
وبحزن شديد
قمت ناولته الولاعة
ولعت
لكن وقعت من بقه ع الارض
طلعت من الكيس المحطوط علي حجره
السماعة
حطيتها علي صدره
ما سمعتش نبض لكن فجأه
اتكلم
علي فكره
مش اول مرة أموت
أنا مت كتير وصحيت
ديوان
كان عمري ستاشر ربيع
شعر
محمد فهمي
نفسي
نفسي لما الشعر أقوله
يقع الهوي من طوله
والبدر أطوله
والمجد أنوله
زي عطر السوسنه
وتدوب قلوب كل الصبايا
ويصير غنايا فوق شفايف كل عاشق دندنه
ويصير بكايا كاس سعادة
يشربه كل دامع بالهنا
ويصيرصديق للوحيد
ونقطة نور
نفسي لما الشعر أقوله
الكلام يطرح زتون
ويطير حمام بين السطور
وتصير كراسي السادة الحضور
أشجار ربيع
وتتفجر الينابيع من السجاد
ويسقف نزار قباني
ويهتف فؤاد حداد
وترقص عقود الماس علي صدور الزهور
وتسكر كاسات الحنين
والناس تقول
قلت يابني
كل اللي كان نفسنا نقوله ومش عارفين
سهر الليالي
القافلة سايرة
والكؤوس المرة دايرة الدور
وقمرنا ياسهر الليالي طافي النور
وأملنا باني قصور رمال
وطيورنا طايره للمحال بجناح كسير
ووفاءنا وهم كبير
وصلاتنا للإخلاص
تكفير ذنوب
وجراحنا وان صارت ندوب أليمة
مش شغل سيما يا ناس
ولا كاس في بار
ولا كيس فشار
دا الحب لعبة استمرار وفوبيا
وعمك افلاطون كان بيضحك ع الدقون
باليوتوبيا
وليلنا كوبيا وسادة ووسادة خالية
والعقل رغم إنه نضيف
بس مش عايز يفكر
أو يكسرتابو جنس قافل بابه عليه
وباني جدار ما بين الروح والروح
ما بين الدوح وأزهارها
وأسراره رافضة تبوح بأسرارها
والقافلة سايرة ف مشوارها تنوح
إمتي تاخد تارها م الطوفان
سفينة نوح
يا سهر الليالي
نصيحة الاخت ميادة
ياااااااااه
ماتغيرتش خالص
نفس الضحكة
نفس الصوت
نفس اللمعان اللي ف عينك
وهدومك نفس الالوان
أزرق
كحلي
سماوي
والله زمان يا محمد!!
أخبارك
فينك دلوقت
لساك بتحب الشغر
لساك مجنون
كل قصايدك عندي
حافظاها
بتفكرني بأجمل أيام ف حياتي
بالسيما
بالمشاية
بطب المنصورة
بالضحكة بتاعتك
جوزي
زى حالاتك وحالاتى
دكتور
تخدير
طيب جدا وف حاله
ودا عيبه وميزته ف نقس الوقت
أهلاوى
علمنى أتفرج ع الماتشات
وكمان علمنى العب طاولة
نخرج مين يابني إنت عبيط
حد بيخرج ويا مراته
لأ
مابيقراش غير أهرام الجمعة
بس ساعات بيحل الكلمات المتقاطعة
عندي محمد
لاسع زيك
ونادين
عقبالك
م الحق معايا صورهم ف الشنطة
اعقل واتجوز
سيبك من أفكار العقاد وأنيس منصور
دا يودوا ف داهية
لازم نمشي زى الناس ماهي ماشية
لأ
مش مبسوطة يا سيدي
لو فكرت للحظة ف حالي
هاخرب بيتي بإيدي
بطلت اسمع فيروز ومنير
بطلت اقرا نزار وجويدة
بطلت اعمل كل اللي باحبه
البيت أولي بتمن الجرنان
ياااااااه
الوقت سرقنا
كان نفسي اتكلم وياك للصبح
ها ستأذن
كلمة أخيرة من أختك ميادة
اعقل واتجوز
أمتع شئ ف الدنيا إن يكون عندك أولاد
واختار أساميهم انت بنفسك
طول عمرك شكاك
عارفاك
نمرة تلفونى معاك
إياك تتكلم
رسالة حب إلي عبد الرحمن الابنودى
كان نفسي اشوفك
واقعد معاك
علي شط نيلك
كان نفسي أخطف
من ضي ليلك
ونس
للوحدة وجذوة نار
كان نفسي أخطف
من صهيلك
فرس
أفتح به طروادة الاشعار
كان نفسي أعرف
هو ليه
الشعر طاب
فوق نخيلك واستوى
من أدان ديك الهوى
فوق الجدار
ديك النهار
من غنوتين
من ضحكتين
غرقانين ف الهزار والشجن
كان نفسي أعرف
هو أيه اللى بينك وبين الوطن
وليه انت بالذات
اصطفاك وخلاك
صوته
وقت الإنتصار والانكسار
واستوطنك
لما هاجر م الحصار
واستأمنك لما حب يسيب النهار
ف إيدين أمينة
الشعر يا رمان
بوصلة ف سفينة
زرقاء يمامة
الشعر عارف
أمتي هتزول الغمامة
والحلم يرجع بالسلامة
من غربته
من يومه عارف سكته رمان
زى لامبو وقطته
ع الجسر ماشي
كالقمر حافي تحت شمس بؤونة
والبالونة والصنارة تحت الباط
والترعة
عياط الفلاحين
والخطوة واثقة
والنظرة عاشقة
ضحكة الناس الطيبين والغلابة
ف النجوع والكفور
والكتابة
مش بصابع موز
وجوزالهند
وعود بخور
الكتابة
مادنة نور وظهور مسيح
والوقوف ف وش الريح
والمشي فوق الصفيح الساخن
والتحدي للمداخن والغباروانتحار الموهبه
بالمفردات الطيبة والموالسة
الارض بنت جميلة
لكن منتهي الاد ب
والفجر مهر
والقمح الدهب
والزفة صبايا بيغسلوا المواعين
والعريس فاس
مصنوع من دموع العجين
ومن خشب الجراح
في صدر فلاح
بكرة الصباح
يطلع
من شقوق رجليك
من بصيص الامل ف عنيك
من عرق باطك
وإحباطك
من ورق غنواتك
من صلاتك فوق شوية قش
وقت رش القطن
وقت جمع الدودة
ما ماتتش يامنة
يامنة لسة موجودة
قاعدة عند الفرن
تخبز البتاوى
لاجل تكتب عليه غناوى الثورة يارمان
واجمل غناوى الشوق
إنت ساكن تحت
ولا ساكن فوق ويا النجوم
إنت زى الطيور بتطير
ولا زى السمك بتعوم
كان نفسي أشو فك
واقعد معاك
يا هل تري حلمي
ممكن يبقي حقيقة ف يوم
رحيل دون كيشوت
شقت جيوبها الغمامة
رقت قلوبها الحدايق
والموت حمامة
تحت جناحاتها حرايق
ودموع خلايق ياما
والموت نعامة
دافنة راسها
في مداسها
وان حد داسها
بتقوم قيامة
والموت جرادة
بتقرقض دهبنا
وتصحي عذابنا
وتقابل غضبنا بابتسامة
الجداول أرامل
والسنابل يتامي
يا قهوة سادة
بتشرب وجعنا
إدي للعبث معني
يا أهرامات
فين الفراعنة
فين قريش يا تهامة
فين هابيل يا قابيل
الحزن ضحكة عزرائيل
والعويل هديل الرماد
مين اللي مات يا ولاد
سأل المداد المشربية
سألت جوامع في شوارع الحلمية
دمعة فوق خد الصبية زيزنيا
اللا بسة توب الجهامة
جاوب سواد الليل
جاوب حداد الخيل
جاوب سهاد النيل
مجروح المشاعر والكرامة
غرقت العوامة
لكن أسامة
حي
صوته
ضي وعلامة
وعينه
زرقاء يمامة
في صحاري الشعوذة
لو حد يسأل هو فين
ما تشعروش با لأذي
قولوا بياخد عزا الشذي
في الرجولة والشهامة
قولوا بيدفع جزا الأستذة
قلبه غرامة
قولوا تسامى
ع الدنية
والخطية
والمنية
لكنه عمره ما باع القضية
أو تعامي
عن ألمنا أو أملنا
في الوصول شط السلامة
لكنه عمره ما مد إيد ه الشريفة
أو حني هامة
قدام خليفة أوعمامة
قولوا قلب الوطن مدبوح
وراح يركب له دعامة
ما تقولوش مات أسامة
زينة شباب حتتي
وعمدة قريتي الطيبة المظلومة
والموهبة المهمومة والهمامة
ما تقولوش مات أسامة
قولوا بيكتب ملحمة
ع الا بالسة والملايك ف السما
قولوا قاعد ويا دانتي والمعري فوق غمامة
بيدردشوا لحد ما تقوم القيامة
ف الكوميديا والليالي والرسالة ما تقولوش مات أسامة
نجوم العصر
سبحان الله
أفشل واحد ف زمايلي
بقي معبود الجماهير
سبحان الله
جون واحد
خلي البيت الطين إتحول قصر
والعربية اللي راكبها
بمرتب كل دكاترة مصر
ف الوقت اللي انا كنت با ذاكر فيه
واحرت ف بحور الفيزيا
كان بيعط ف سيما النصر
كان بيشوف حمام الملاطيلي
للمرة المليون
مين انت يا شامبليون
جنب زميلي
اللي بقدرة قادر
فك رموز اللغوة المكتوبة
علي حجر العصر
والله خسارة يا أحلامي
اقرا علي روحك حتي الفاتحة
هادخل معهد سيما يابابا
عايز تدخل أيه يابن الفالحة
طب هادخل إعلام
ادخل نام واتغطي كويس
واغرق ف جراحي وأحزاني
وانانايم صاحي
أرمي وداني
ابنك بيهلوس يا سعاد
شكله كده ملبوس
بكره الصبح تجيبي بخور علشان ترقيه
بعد الشر يا فهمي
بتقول كده ليه
معقول
يا خراشي يا ولاد
مش جايز يعني
بيهلوس من كتر الاجهاد
مش جايز دواوين الشعر اللي بيقراها
لحست عقله
جايز جدا
كل الشعراء مجانين ومخاويين إبليس
من بكره الصبح
تاخديهم تديهم لأمينة بتاعة الطعمية
تعملهم قراطيس
ودخلت الطب
بقيت دكتور
بالبس بالطو
بامضي حضور
ولأني جبان
وعشان ما دافعتش عن حلمي بإصرار
أفشل واحد ف زمايلي ستار
وانا واحد م الجمهور
رسالة إلي ابني
إزيك يا بني يا للي ما تعرفنيش
ها حكيلك عني وبكره تعيش وتشوفني
مع إني لحد الآن ماقابلتش مامتك
وعظمتك عارف
لكن مش راضي تقول
وهتفضل طول عمرك كائن مجهول بالنسبه لي
قبل ما تيجي وعلي بالي
وشايل همك
وبادور علي مامتك بين ملايين
قبل ما تبقي جنين بتعيش فين
يابن الكلب
جبت اللؤم دا كله منين
عايز تعرف من دالوقت عظمتك هتعيش فين
والله ما عارف
دايما ابوك متهور وبيفتح علي نفسه بيبان
مابيعرف يقفلها
يابن الكلب
من أولها عرفت إزاي تكتمني
من أولها قريت شخصية ابوك
دكتور الباطنة الصعلوك
والفاكر نفسه ابن ذوات
والصايع
والضايع
واللى مقضيها بنات وحشيش
بكره تعيش وتشوفني
م البيت للجامع
وتشوف فوق قورتي زبيبة
وتشوف الطيبة ف عيني
ومش هتشوف كل ذنوب وخطايا شباب محروم
وهاقولك صلي
وهاقولك صوم
وهاقولك قوم ذاكر
وها كونلك أنا وامك ناكر ونكير
وهاطلع دينك وانت صغير
وتطلع ديني وانت كبير
وهاحبك جدا
وهاقولك عيش حقق احلامي
ما تكسفنيش
وادخل طب
رتب ع الدفعة
واتعين ف الجامعة
لاجل ما تبقي طبيب مشهور
وهاقولك لف ودور ف الساقية ياتور
وهاموت لو فكرت تثور ع الحزب الحاكم أو ع الدين
وهاموت لو تبدأ تد خين وانت ف إعدادي
عايزك هادي وتمشي جوار الحيط
عايزك تبقي بسيط
ما تكونشي معقد زيي
عايزك تحرق أي قصيدة
أي رواية
أصل الفن بعيد عنك وعن السامعين
مسكون شياطين
لو تمشي وراه
مش هتطول لاسماه
ولا سقف الناس العاديين
خليك معني بذاتك
ما تضيعش حياتك تجري ورا أحلام كدابه
اجري ورا أحلام ملموسه
دنيا الفن دي غابه
عايزه نفوس مهووسه
بحب الشهره
وحب الموت
ما نكرش الفن إدالي المتعة
كان شمعة ف ليلي ودليلي ف صحرا الاحزان
وكمان كان خلي وضلي وشاش علي قد جراحي بالمللي
مانكرش كمان
هافضل احبه أكتر منك يابني
ياللي ما تعرفنيش
بعد ما اموت
هيعيش فني وانت ما تلزمنيش
الناس ف شارعنا
لما طلعت الاول ف الثانوية العامة
كل الناس ف شارعنا
غنوا ورقصوا ف الوسعاية
لحد الارض ما قالت بس كفاية
والشبابيك
ودنها وجعتها من الزغاريد
والشمس
نزلت غنت أجمل أناشيد الفرحة
ولا عايدة الشاعر في زمانها
والبدر وراها بيعزف ع العود
لما عملت الزايدة
كل الناس في شارعنا
كانوا واقفين علي نبض قلوبهم
علي باب مستشفي سمنود
لما أبويا اتوفي
كانوا بياخدوا عزاه مني
كانوا بيبكوا بدالي
كل الناس في شارعنا
ياعم
يا خال
يا عمة
يا خالة
واخوات اصحابي اخواتي ف كل الاحوال
وقت الاكل ما يتحط
اقعد كل ويا اخواتك
دانت حماتك بتحبك
ما عرفتش إني وحيد
غير بعد ما خدت الاعفا من التجنيد
ما عرفتش برشام النوم
غير لما بدأت أنام ف سرير غير
اللي امي ولدتني عليه
في شارعنا بيبان الدور ما لهاش مفاتيح
زق الباب وادخل
مكسوف من أيه
عيب
ما يصحش
هو انت غريب
في شارعنا الناس
بيصونوا العيش والملح
بيربوا طيور ع السطح
ولسانهم بلسم ع الجرح
وقلوبهم طرح البحر
وطيبتهم
كالورد النابت ف الاسفلت
كالشمع الوالع ف الغيط الضلمة
في شارعنا الناس
رجليهم ف الطين
بس عيونهم باصة لفوق
اخر شفطة ف كوباية الشاي
بيقولوا عليها الذوق
بيسموا بناتهم بدرية وشوق
ويسموا ولادهم
علي اسم اطهرمخلوق
انا مديون للوسعاية
باجمل ايام ف طفولتي
للبحر اللي شارعنا بيطل عليه
طلة عاشق هيمان
ترابيزة البنج ف صالة النادي
كوباية اليانسون على قهوة عم الشحلوت
اشجار التوت والجميز ع الجسر
مهما تقسي
ليكي ألف جميل يا مصر
ستي فهيمة
أمك أميرة وطيبة وغلبانة يامحمد
والنبي تشيلها ف عيونك أمانة
بلاش تزعلها وتخيب أملها
ما عادش ليها بعد ابوك ف الدنيا غيرك
ما عادش ليها بعد اخوك ف الدنيا غيرك
اجدعن كده وشد حيلك ف المذاكرة
امك لما تشكيلي من قعادك لوش الفجر
برة البيت
دا من خوفها عليك
بكره لما نموت
هتحس بقيمتنا
وتشتكي لعضم تربتنا مواجعك
بكره هتخلف وتعرف إن الضني غالي
بكره الليالي تعرفك قيمة الاهالي
أبوك ألف ورحمة ونور عليه
كان أمير
كان فقير اي نعم
بس عاش طول عمره مرفوع الجبين
وانت طالع جاحد لمين
وليه
طب بيعلموكم ف المدارس ايه
امك اميرة وطيبة
والزمن دوقها مر كتير
بلاش تزعلها
وتخيب املها الاخير
اختك سيدة زورها من وقت للتانى
الواحدة من دول بتتباهي بدخلة اخواتها عليها
قدام اهل بيت جوزها
بتتحامى فيهم من قسوة الايام
اهلك ناس علي قد حالهم
لكن علموك أحسن علام
دخلوك الطب
كل اللي انت عايزه بتلاقيه
اقلام
دفاتر
مساطر
دروس خصوصي
اشيك هدوم
احدث موبايل
يبقي يابني ما تستعرش منهم
بكره تتخرج وتعرف القرش بيجي ازاي
قوم فز اعملنا شاي
وناولني حباية اسبرين من فوق الدولاب
صدعت راسي
والكلام
لا منه فايده ولا منه عايده
وطفي اللنده اللي قايده ف وسط الد ار
نور ربنا كفاية
ولاانت بتقول ستي عامية مش شايفة
ياواد يابن فهمي
دانا قبل ما سمع دبة النملة باشوفها
وباعرف الساعة بالثانية م الشمس والضلة
علي بسطة السلم
سيدك كان معلم وابن سوق
وكان بصباص وخباص
وعيونه ما يختشوش
علمته يمشي ع العجين ما يلخبطوش
ستك فهيمة
كانت قوية ومفترية
ونظرهااللي راح ما راحش من شوية
غيرشي الشقا والفقر
ولا كان هيقدر عليا حتي الموت
ما كانشي مية ف البيوت
ولا كان فيه نور
كنا بنقول يا دكتووور للمزين
والواحده تتعب تخاف تبين
ليحجزوها ف المستشفي
كان زمن مطين بطين
خلفت سبعة
اللي مات ساعة الولادة
واللي مات بالكوريرا
دلوقت الطب اتقدم
والناس اتنوروا كتير عن زمان
سيدك الله يرحمه لو عاش وشاف
التلاجات والغسالات والمراوح
والورقة ام ميتين جنيه
كان قاللي الحقي يا فهيمة
اجري استخبي
يوم القيامة قرب خلاص
اجدعن كده وشد حيلك ف المذاكرة
عايزه اتباهي بك
وادخل أي مستشفي أقول
أنا ست الدكتوووور محمد
وان حد جاب سيرتك مرة قدامي
أقول دا ابن بنتي
ياااااااه
ياستي
رغم موتك من زمااااااان
صوتك لسه بيرن ف وداني
زي ما تكوني لسه عايشه
جنتي المفقودة
كانت وما زالت حبيبتي و جنتي المفقودة
والملهمة لأشعاري
وذكراها عصافير
نايمة علي رموشي
ومشواري
كل خطوة فيه بتوجع عيون ما نا موشي
من يوم عيونك يا حبيبتي
ما ناموا ما صحيوشي
وف عز يأسي بافتكرها الامل يرجع
والفضا يوسع
وتزول الهموم
مافتكرشي ف يوم
قالتلي كلمة جارحة
كلامها كله برتقاني
الشنطة والساعة والطرحة
برتقاني
والدنيا فاتحة حضنها
ومداريه حزنها تحت ضحكة برتقاني
بعد ما تخلص كلامها
تبتسم
تضحك ضحكة خجولة
ضحكة مزيج م الهديروالهديل والطفولة
كنا لسة ف اولي جامعة
والدنيا واسعة وبراح
والصباح اطعم كتير م النسكافيه
والجنيه
كان يملا عين سواقين التاكسيات
ايامها كانوا بيضحكوا ف وش الزباين
والجرسونات ف الجناين
والبنات ف المكتبات
كانوا تمللي بيضحكوا ف وش الزباين
ضحكة خالية م الغرض
زي ما يكون المرض
صاب حبيبتي
وصاب البلد في نفس ذات اليوم
يا هل تري فاكراني
باوحشها
قد ما هي واحشاني
طب ايه حايشها
تيجي وتطبطب على اكتافي
وتضمني ف حضنها الدافي
تخبيني عن عيون البشر
واخبيها عن عيون الزمان
معقول سكوتك يا حبيبتي
هيفضل للأبد
يارب ليه تخلق ساعات إنسان يتعبد
وبتخطفه ف زهرة شبابه
يارب اسف سامحني
قلبي عذابه فاق عذاب ابنك يسوع
والضلوع ما عادتش مستحملة دقاته
يا هل تري اللي ماتوا هما اللي ماتوا
ولااحنا اللي متنا
يا هل تري بيسمعوا صوتنا
ولا بيسمعوا صدي
صدي
صدي
أبو سمرة السكرة
قلبه احن م اللبلاب
والبلابل لما بيعوزوا يستحموا
ما يلا قوش غير عيونه جداول
لما بيعوزوا يغنوا
ما يلاقوش غير صوابعه غصون
لما بيعوزوا يصلوا
ضحكته محراب
قاعد تمللي وف ايده الكتاب
والسجاره السوبر
وقدامه كوباية اليانسون
النهارده ستة اكتوبر
يوم ميلاده
ماحدش بيسأل عليه من ولاده
غير يوم مايقبض
بس انا باعتبره اب
لما بابقي مضايق باطلبه
الوووووه
يقولها بصوت جهوري ومعدني
اسكت
يكررها اطول شوية
اسكت
الوووووه
اسكت برضه
شكلك تبع اخوانا البعدا
اسمعها وادبدب ف الارض من كتر الضحك
ازيك يا محمد
مش هتبطل الاعيب اخوانا البعدا
النمرود عمال يبعتلي دكاترة يراقبوني
ويحطولي السم الهاري ف قلب الاكل
النمرود مش ناوي يجيبلها لبر
بيموت ف الشر
لكن دمه خفيف
بيسليني ف وقت فراغى
وانا كبرت دماغي خلاص
حطيت اعصابي ف تلاجه
مش عايز حاجة
انا باحكم ف العالم من مطرح ما نا قاعد
ايد علي ايد اهي برضه تساعد
شكرا يا بو سمره
يا سكر
حبيت اسمع صوتك مش اكتر
واقولك ياللا حالا بالا
شكرا يامحمد
خد بالك من نفسك
واوعي تسيب الشعر عشان الطب
هو اللي مخليك انسان
تصبح على خير
تصبح علي حب
وانت كمان
واقفل وانا فرحان
ان الدنيا فيها ابو سمرة
وافرح اني قابلته
قبل ما قابل احزاني
واتصالح مع نفسي
وابدأ من تاني طريقي
ابو سمرة ف رأي الناس
مجنون
لاسع
راحت منه ومش راجعة
وف رأي الطب النفسي
فصامي ومسكون ضلالات
وف رأيي
أطيب إنسان ف الكون
واظرف إنسان ف الكون
وعلاجه جريمه
والدنيا بدون أمثاله
عديمة اللون والطعم
أنا عشت معاه سنتين كاملين
شجرة ياسمين من لحم ودم
نجمة صيف
طفل كبير
صادق مع نفسه بشكل مخيف
وشعاره طول ماانت ما بتضرش غيرك
اعمل ما بدالك
أبو سمرة
كان كاتب علي كل جدار ف الوحدة الصحية
انا باكره كل الناس الخونة الاشرار
اتباع النمرود واخوانا البعدا
لكن كان اكتر إنسان بيمدإيديه للناس
بيحب الدنيا
ويقوللي
الدنيا جميلة وتستاهل تتعاش
ويقوللي
الستات بيحبوا الراجل الندل
ويقوللي
طوب الارض بيكرهني
حتي الحشرات
حتي النمل المعروف بالطيبة وبالإخلاص
دايما يقرصني في مكان حساس
الخمرة مفيدة
لكن إدمانها بيهري الكبد
وانا قدك خدت الدنيا ف صدري
يابني أنا أفشل واحد في اخواتي
أنا أفشل واحد في الكون
ملحوظة
بيقولها بدون أي مرارة
الراجل ف سلام مع نفسه أكتر من بوذا
ملحوظة كمان
أبو سمرة مش شاعر
لكن يعشق يتكلم بالسجع
مثلا
وانا باكل مكرونة
سابني وراح البلكونة
ويموت علي نفسه من الضحك
وانا طبعا اكتر منه
إحنا الاتنين أكبر مجانين ف الدنيا
مجانين مجانين بس نعيش
ابو سمرة
من مواليد 55
شكله أقرب للألمان م المصريين
لكن يضايق جدا لو واحدقال له
شكلك مش مصري شكلك ألماني
بيقول عن نفسه
أنا صورة طبق الاصل من رمسيس التاني
ويطلع صورته من محفظته
ابوسمرة حكاية طويلة
قد ما تبسط
قد ما توجع
الله يمسيك بالخير يابوسمرة وصوتك
يفضل ف الدنيا ملعلع
اعذرني
الدنيا تلاهي
وواخداني
لكن ذكراك
أيامك
لياليك
ساكناني
م المحزن جدا
إنك ممكن
يديك طولة العمر ربنا
إنك ممكن يعني
من غير ما عرف
من غير ما خد منك حضن طويل وأخير
من غير ماخد يا صديقي عزاك
لكن بيصبرني
إني بعد ما موت
هابقي معاك
ياطيب واظرف إنسان
ربنايديك طولة العمر
عشان ياصديقي نموت مع بعض كمان
يامصر
كل مركب ليها مينا
ليها مرسي
وانتي يا بلدي الحزينة
علي مر الدهور
موج يشيلك
موج يحطك
إعصار يروح
طوفان يجيلك
والشط يفتكرك وينسي
والمراكب كلها وصلت
وانتي لسه بترقصي رقصة المدبوح
زوربا المصرى
يا نخلة بتمطر بلح في أرض بور وسنين عجاف
قلبي لم عمره شاف
يا كامل الوصاف
حد زيك
في سماحتك وف صراحتك وف نصاحتك
وف قلبك الطيب كما
قلب الطيور والزهور والفراش
وف عقلك الناضج في نار التجربة
الدمعة ف عيونى مكدبة
إنك خلاص طالع معاش
واش يا واش
الشمس بتقولك بلاش
والصبح بيقولك بلاش
الدنيا هتضلم
يابو كلمة بتعلم عالقلوب والضماير والستاير والحيطان
يا بو ضحكة غيط برتقان
عايز أقول للحظ شكرا بامتنان
إنى قابلتك ف الطريق
يا اب وصديق في زمن خوان
وف دنيا غابة
يا بو طلة بتخلي الكآبة سرور
حضرتك دكتور
ولا شاعر ربابة
ولا عازف عود
ولا سندباد
دايما بتيجي ف المعاد وضحكتك سابقاك
وجايب معاك ألف نجمة صيف
الف مركب
ألف جدول
ألف أغنية من اجمل اغاني زمان
قعدتك مهرجان
كرنفال
احتفال بالحياه والوجود
حضرتك مولود في برج الحوت ولا في برج حمام
اسمك إمام وانت ف اللمة إمام
وف القمة إمام وف براءة الذمة إمام
وف علو الهمة إمام
ومش ناقصك بس غيرالعمة والقفطان
وتبقى إمام ف الدين
يا موسوعة
الدمعة ف عيونى بتقولك وهى موجوعة
سلام
والورد بيقولك سلام
ناصية كل شارع في مصر القديمة
بتقولك سلام
مادنة كل جامع
أجراس الكنيسة
البالطو الابيض
كارنيه النقابة
المرضي الغلابة
كل طرقة ف مستشفى دار السلام بتقولك سلام
والغمام بيقولك تحت امرك كل الا منيات
نص عمرك فات لسه باقي نص تاني
لسه قدامك طريق مفروش اغاني ما ابتداش
ياما لسه ف الجراب
مليون كتاب
أيام جميلة ماعشتهاش
الفين جزيرة مازرتهاش يا سندباد
احلام ولاد
مصرنا التايهه ف البلاد تعود وتضمها ف حضنك بشوق
نيلنا المريض في غرفة الانعاش يفوق
ليلنا الطويل يطلعله فجر
يشبهلك تمام
في صراحتك وف سماحتك
وف قلبك الطيب كما قلب الطيور والزهور والفراش
مش باقولك
لسه قدامك وقدامنا
طريق مفروش بالتمرحنة ماابتداش
إلي الفاجومى
اشعر ياجيفارا
يابو نوارة
اهدي قلوبنا المحتارة
اهدم أحزانا الجبارة
عارفك واقف علي قبر ولادنا بتوع العبارة
وبتوع القطر
وبتوع المسرح
وبتوع الطيارة
ودموعك نازلة بغزارة ومرارة
ألف ندامة وألف خسارة
بتسلم
بتعزى
حاضن أحزانا بحرارة
عارفك بتحارب اشباحنا بكل جسارة
يابو قلب منارة
يابو ضحكة حضارة
يابو كلمة بتفهم اكتر من الف وزارة
ياجدع واشجع واد ف الحارة
عرفنى ازاي بتلخص ف عبارة جراحنا يا مصباحنا وشمس صباحنا
دايما تلمحنا وتفضحنا وتجرحنا وتنصحنا وتمنحنا السلوان
دايما حابب مطرحنا
دايما واقف ف المحنة فريحنا
دايما تفرحنا ف عز الاحزان
يا جنينة فاكهة ومفتوحة لكل جعان
يا ادان
قلبك ياسمينة ساعات وساعات صوان
قلبك هو السد العالي ف نيل اسوان
هو الكحكة ف ايد غلبان
هو القلة ف ايد عطشان
هو الضحكة المرسومة ف عين شقيان
هو القمح الطارح في غيطان كل المصريين
هو دعاء الام في ليلة قدر
هو سماحة الدين
هو اللمة الحلوةوساعة الحظ
هو الخطبة السياسية الرنانةوطظ
هو الشاي وسجارة وانا كده عايش سلطان
هو البنت المصرية نضارة معدية
وشكل الدنيا هيبقي ازاي من غير نسوان
هو ردار وكمين ف السكة وكله بيدي لكله إشارة
هو شهامة كل ولاد الحارة
واشعر يا جيفارا
يا بو نوارة
2
اضحك يا فاجومي وضحكنا معاك
اضحك يا شطان وملاك
اضحك يا مخللي الزنزانة جنينة اسماك
اصل الضحكة بتاعتك
صافيةودافيةوشافية ووافية
واحنا بلا قافية
صارت ضحكتنا بتطلع بالعافية
صفرا وحافية
زى اللي بيغسل اسنانه بمسواك
كارهين الدنيا وبنرفرف
نفسي اعرف
قادر ف السجن ازاي تعشق دنياك
الحلو ف ايدنا كاس علقم
والمر ف ايدك
ويسكي وكونياك
شايل سيفك بتحارب
واحنا بنتفرج من شيش شباك
خايفين من طيفنا ومن خوفنا
وانت امك م الخوف فاطماك
نازلين للارض السابعة
وانت بجرأة طالع لسماك
عارف حقك بتحاول تاخده
حتي ان كان علي كف قضاك
شايل كفنك
ماشي تغني
بتهزر والموت بيهزر وياك
فاهم اولها وآخرتها
والفولة ولبتها
مديها الطرشة
مديها قفاك
عايش يومك رامى همومك
كل هموم الدنيا راميها وراك
دايما راجل ملو هدومك
والكلمة بتاعتك من راسك من جواك
والقرش اللي يذلك بين ناسك
ينداس بالجزمة ولاليه لزمة
طول ما الستر معاك
يعنى سعادتك هارش كل الليلة
والدنيا الهابلة مش هابلاك
حالق ومكبر ومنفض للنفخة الكدابه
سبت الغابة وعايش زى النساك
ماشى وكاشف كل جيوبك
كل عيوبك
كل ذنوبك
ماشي ورافع راسك
ثابت في خطاك
واحنا ف سيرك
كل الناس بلياتشو جميل
بس الواقع مين ادرانى ومين ادراك
نفسي تعلمنا جنونك يا فاجومى
داحنا العقل بتاعنا هلاك
اضحك
اضحك يا مخللي الزنزانة جنينة اسماك
3
اشعر يابو نواسنا
ياونسنا
يا فارسنا
مش ناقصينك بس انت ناقصنا
شعرك بلمسنا
عرفنا
ساسنا من راسنا
ضحكنا وافرسنا
داحنا لحسنا واحتاسنا
مات احساسنا
نحسنا
افلسنا
بعنا نفوسنا ونصوصنا وعاداتنا وطقوسنا
قاعدين بنمجد ف لصوصنا وتيوسنا
وفلوسنا بنجيبها من دعك فانوسنا
مش من فاسنا وروسنا
اصل القهر داسنا بمداسنا
دهسنا
هرسنا
مش عارفين ناخد منه نفسنا
قلعنا لباسنا
كل ما يلعب فينارقصنا
وكمان ناوى يورثنا
4
اتكلم يا فاجومى
يسلم فمك ولسانك
دايما سابق عصرك وأوانك
زى الانبيا
وادانك بيصحي الناس الأغبيا يصلوا
اتكلم واوعي تبطل سخرية
وان شالله عدوينك يتشلوا
أو ربك يبليهم برزية
من كتر بجاحة اهاليهم
واقفين فوق روحنا المحنية
يبنوا ويعلوا
حبة حرامية
سارقين الشمس ونورها وضله
واكلينها ولاد الايه
شافية مشفية
وكمان بيحلوا
ويقولوا الشعب بتاعنا ايه اللي جراله
ايه اللي حاصلوا
مش عايز ينضف ليه من حقده وغله
احتارنا يا امريكا ف حله
الشعب المصري ايه اللي فاضله
داحنا يدوب بنلاقي رغيف العيش
حزمة جرجير
قرصين طعمية
وعصيرنا حبة سكر ف المية نبلوا
طالبين الستر ومش عارفين نوصللوا
لو نسمع احياناان فلانايكسب كام مليار ف الشهر
دايما بنسبق حسن النية
ونقول اذكيا
والرزق يحب الخفية
أما احنا ولاد فقرية
اتكلم يا فاجومى
البداية
اصل الحضارةعلامة استفهام
والمنارة ايد بنا
والعبارة زقزقة عصفور
صدقونى الدنيا ممكن تبقي جنة
والضلمة ممكن تبقي نور
لو طيور الاسئلة تهجر جحور الخوف
احنا ليه خايفين نشوف
كل افكارنا القديمة برؤيا تانية
كل ثانية وليها قيمة وليها دور
والنسور لو تهون بياكلها دود
والدنيا فانية بس نحلم بالخلود
والردود الجاهزة لعنة
والجدود عاشوا ف زمان غير زمانا
والظروف غير الظروف
احنا ليه خايفين نشوف
العلم ف الاسلام فريضة
احنا ليه خايفين نداوي
كل افكارنا المريضة والعقيمة
والجهل تيمة مكررة
ف روايتنا وف عاداتنا وف لغاتنا وف مماتنا
وف حياتنا بكرة بيبص لورا
احنا ليه كل شمس منورة بنطفيها
كل عالم جاي بفكرة بنرجمه بيها
كل نسمة بنعاديها ونتاويها تحت احجار البلادة
والفكر عادة بنحاربها كأنه عار
والنهار خاصم بلادنا من زمان اخناتون
والضلام قلبه جاحد والعيون
دا البحر واحد والسمك ميت الف لون
والجنون ممكن يكون الهام
والشك مفتاح اليقين
والحنين للماضي قمة الاوهام
اصل الحضارة علامة استفهام
شكرا يا خالد باقولهالك بصوت واطي
واحباطى حاضن بصيص الامل ف عنيك
ما عليك اعمله والباقي سيبه للزمن ولحكمته
بكره الوطن لما يفوق من غفلته
يستغفرك
ويبوس ايديك
ويدوس ايدين
كل عملة مزورة
يا قبرة بتغنى فوق شجر السكوت
كمل غنا
وانسج حرير المنى من خيوط الاسئلة
دا البلبلة افضل كتير من هدوء الموت
والبداية للوصول لنجمة الحرية
خش التكية ودوق التوت
واكسر النبوت
القوة قدرة ع السؤال
وصوت
رافض يطاطى للجبال
او ينحني للريح
دم المسيح وصمة في جبين البشر
والقمر شاهد وسامع
القوة جامع وجامعة
طفل بيذاكر علي ضي شمعة
طفل اصبح اسطى ف الصنعة
طفل بيعد النجوم والشمس طالعة
بالذمة مش مهزلة اللي بقينا بنسمعه في خطبة الجمعة
امسح يا خالد دمعة وطن مقهو
شغل موتور قطرنا القشاش
حرك شعور الميتين
داالصبح لسه ما جاش
وطه حسين نايم في قبره حزين
وعرس الزين صار مناحة
والساحة فاضية للمهرج
والمشعوذ والمقاول والجهول
بينا وبين بكرة
الف باب مقفول
قول يا خالد لبلدنا تصحي
كفاية نوم
كلمتك همسة جارحة
وغنوة فؤاد مهموم
فاكهة صابحة
دم انضف من دمنا المسموم
فستان وطرحة
كلمتك بتطفش الغربان والبوم
وبتحلم بيوم
مصر تبقي
اجمل عروسة في الالبوم
هنا القاهرة
والله ليكى يا مصر رهبة
وليكى هيبة
وليكي ملة عجيبة
وليكى طلة كئيبة
والغريبة اني جايلك
كلي شوق
اطلع لفوق وامسك نجومك
مين يلومك
لو قسيتى ع الغريب
واللي جايلك من بعيد
وانتي قاسية ع القريب والحبيب
مين يلومك
وانتي طالعة من هدومك
من عجايب
شعب سايب
كل جسمك
يا صبية وجاي ينام
فوق كف ايد
مين يلومك
وانتى حاطة ف المحطة
باب حديد
وسيوخ حديد
واقفين عساكر
والتذاكر
قاطعين نشالين
والشحاتين
مرصوصين ع الرصيف عقارب
والبياعين تعالب
والسواقين عناكب
والمناكب ف المناكب
ف الشوارع والباصات
والسيمات والمولات
والقهاوي والكباري
والمراكب
واللي راكب
عايز يدوس ع اللي ماشي
والهوا بفلوس في مصر
يا خراشي !!!!
فاشي قلبك ولا نازى ولا سادي
كله عادي
كله راضي عن حياته الغير لذيذة
طول ما مترو الجيزة
ساير ع القضيب
طول ما مترو المرج
طاير زى الحدادى
في سحاب الاكتئاب
طول ما ضلي
لاقي مللى يصلي فيه
كل نوبة اغتراب
طول ما كتفي لاقي سور يركن عليه
بعد جريه خلف السراب
ليه نصيبي سطر افرح
وافضل ابكى باقي الكتاب
ليه يا غاليه ونجمة عالية
ملحوسينك بالتراب
ليه يا مصر؟؟؟
سؤال
يا مصر مالك
قد اصبحت قاسية
والظلم يجرى
كماء النيل دفاقا
تعلو القصور
وغاب الكوخ مندهش
من يا ترى
في بلادى
وزع الارزاقا؟؟
وجع البعاد
لك الآن ان تخرجي من حياتي
وتأخذي الشوق خلفك
وتأخذي آخر ما تبقي في عيون الليل من سهاد
لك الآن أن تصلبي كل حرف في قصيد النار
فوق اعمدة من رماد
لك الآن ان تهدمى هيكل الحب
محرابه
ان تحرقي اعصابه
هذا الذي كان مغتربا في بلادك ثم عاد
لك الآن ان تضحكي يافجر
في حين يبكي البدر من وجع البعاد
المثقفون في وسط المدينة
المثقفون في وسط المدينة
ذباب المقاهي
اعصاب تالفة في جسد الارصفة
كتب مشوهة الاغلفة
كسيحة الصفحات
المثقفون في وسط المدينة
اسلاك كهرباء
تخاصمها العصافير والزقزقات
لحظة الشروق
ولحظة المغيب
شبابيك تطل علي حقل جديب
وجداول خائفة
من السنابل
ومن ضوء القمر
ومن حصي الاطفال الصغار
ومن مشاكسات القمر
الشديدة العذوبة
حين اتيت من قريتك
متلفعا بالرجولة
وحالما بلقيا ربة الخصوبة
وجدت القاهرة
عاهرة
بلا اثداء
ولا شفاه
وخربشتك القطط الواقفة علي بابها
ثم سرعان ما اصبح لك
مثل انيابها
واظافرها الطوال
ما ابأس ماتعلمنا الليال والدماء النازفة
الذكريات
اتذكرك الان
واتألم
اذ كيف يعيش علي الارض حبيبان
لايتبادلان-حتى- تحية الصباح
يهنئان الغرباء عند حلول العيد
ولا يهنئان بعضهما البعض
اتذكرك الان
رسائلك التي تضحكني
مكالماتك الهاتفية التى تملأنى ثقة في رجولتى
طقوسك الشائقة في الاستذكار
وحديثك الباسم دائما
كشمس الصباح
حين تشاركنا احتساء الكابتشينو
اتذكرك الان
واتساءل ما حكم الدين في زواجك من رجل غيري؟
دون ان اوافق
فالحب الذي بيننا رباط مقدس
والحدائق التي جلسنا فيها تشهد
والطرقات التي مشينا فيها تشهد
والجرسونات الذين قدموا لنا مئات المشروبات
يشهدون
اتذكرك الان
واخاف ان اتصل بك
فاسمع صوت امرأة لاتمت لك يا اميرتى بصلة
وتجربتى المتواضعة في الحياة علمتنى
ان محاولة احياء الذكريات قتل لها
لذا
فلن اطمع في امتلاك الوردة
طالما رحيقها في ذاكرتي
سأبوح لك يا حبيبتي بسر صغير
الكتب التي تمتعني احرقها
الاغانى التي يقشعر لها جسدي
لا احفظها علي هاتفي المحمول
صور الفوتوغرافية الجميلة
لا اشاهدها الا بعد مرور سبعة اعوام على التقاطها
اردت ان اقول لك
انني طوال الوقت
كنت اعرف انك حب عمري الذي لن يتكرر
لذا تركتك وذهبت
كنت متأكدا ان ضربة فرشاة جديدة
سوف تأخذ من جمال اللوحة واكتمالها اكثر مما تعطيها
كم هو ممتع
هذا الشجن الذي احسه
عندما اجلس في المساء
اجتر ذكرياتي العذبة
واولها انت
سذاجة
لا رأى لك
إلا واثبتت الايام سذاجته
لكنك ما زلت تعتقد في آرائك
اعتقاد نبي في رسالته
وتدلي بها من فوق منصة دكتاتور
لاحلم لك الا ولم يتحقق
او تحقق
ولم تفرح اكثر من لحظة خاطفة
لكنك مازلت تحرق علبة سجائر كاملة
اذا تباطأ موظف
أتفه من ذبابة
في امضاء ورقة تبدولك
اهم من الوقوف بجانب قلبك
الذي توفي فلذة نبضاته
في حادث مماثل صباح امس
لاامرأة الا وصارت مملة
بعد مكالمة هاتفية
وموعد
وقبلة
ولكنك الان مستعدان تحارب عدوا لاتكرهه
من اجل ان تفوز بنظرة اعجاب
من الجميلة التي تقف بجانبك
في الحافلة المختنقة بالركاب
ولا تشعر لك بوجود
خيانة
كل امرأة اقبلها
اشعر انها صارت امرأتي امام الله
وانها اذا ما سمحت لزوجها ان يلمسها
تلعنها الملائكة
عندما تضطر امرأة الي تقبيل رجل تكرهه
- واغلب قبلات النساء اضطرارية-
فانها تتقيأ في فمه
اما قبلة الرجل الذي تحبه
فانها تزرع وردا علي شفتيها
لا يذبل حتي بعد ان تموت
اخششي ان تفهموا كلامي
انه دعوة شيطانية الي الرذيلة
ولكنني لم اقصد الا ان
ابكي فوق قبر الفضيلة الراحلة
العظمة
انا اعظم شأنا من نيوتن
ولكن التاريخ يتجاهلنى
اذ لا اعرف طباخا في قصر الرئاسة
ولا ساعيا في جريدة
ولا فرد امن في مبني ماسبيرو
انا اعظم شأنا من نيوتن
لأن التفاحة سقطت عليه
وانا سقطت علي التفاحة
وهو اكتشف قانون الجاذبية
واكتشفت انا قانون النفور
انا ارفع مكانة من اينشتين
لأنه يري كل شىء نسبيا
بينماانا – اذا ما عشقت او كرهت –
اري كل شيء مطلقا
انا احق بجائزة نوبل من احمد زويل
لأنه اكتشف الفمتو ثانية
وكتبت انا الفمتو قصيدة
ولكن الجميع يرون قصيدتي ورقة بيضاء
واقول لهم اني اري مالاترون
انا غاضب جدا من دارون
لانه لم يستثن حبيبتي من نظريته
ولم يقل - رغم علمه بذلك - ان اصلها فراشة
دفاعاعن التطرف
لان عصير الفاكهة المثلج الذ طعما
واكثر روعة
ويعطيك الفرصة لتذوقه
ولان الشاي
كلما كان ساخنا
كلما طالت فترة استمتاعك
لذا كن يا صديقي متطرفا
وامسك
منتصفك من عصاه
وتبول – كطفل - في جميع الجهات
لو كنتي دفتر كنت قطعتك مذاكرة
لو كنتي دفتر
كنت قطعتك مذاكرة
لو كنتي بكرة
كنت هاكره اني انام الليل
لجل اشوفك بدري يوم
قبل شمس الشوق ما تطلع من غيوم الانتظار
قبل عصفور النهار
ما يدخل غرفتك
من تحت عقب الدندنة
شايل فطار اجمل سوسنه في الكون
لو كنتي لون
كنت هاسرق منه لوحة موناليزا
برج بيزا
ازاي اسيبك
وانا حتي عيبك شايفه ميزة
وانا قلبي عاشقك بالغريزة والارادة
والسعادة بتكون لذيذة
لما تبقي غصب عنك واختيار
لو كنتي فكرة
كنت هاسرق منها نار المعرفة
واهدي الدفا للبردانين
واهدي الشفا للمجروحين
واهدي الصفا للمهمومين
واجعل شعار العاشقين ضحكتك
لو كنت عارف سكتك من سنين
كان زماني صرت شاعر في بلاط ملك الحنين
ووصلت من اقصر طريق مدن اليقين
وعرفت مين
خلي عيونك كعبة الياسمين والبلابل
واجمل كتير من حدايق بابل
خلانى قابل افضل سجين دار رموشك
من غير ما افكر لحظة واحدة ف الهروب
خلانى اتوب عن ضلالى
واسهر ليالي حاضن قلوب حمرا
واكلم الدبدوب
واكسر كؤوس الخمرة فوق البار
واحلم برنة او رسالة
وادخل في جنة من تحتها بيجري العذاب انهار
كل الصحاب
كانوا بيقولوا استحالة
انى اعقل
وان شفت بس بنت اجمل حبتين
هاسيبك وهارحل من غير ما اقول اعذار
من غير مااسأل في دموع الذكريات
او ربيع الامنيات
او وعود ديك النهار
من غير ما اسيب باقة ورود فوق مخدة الانتحار
لو كنتي مركب كنت صرت امير بحار
سندباد
وسافرت بيكى ارض المعاد
وطلعت فوق جبل العناد
وصرخت قلت في افتخار
انا وانتي شعب الهوي المختار
والجنة لينا والانهار
وبقية العشاق ف النار
لو كنتي زهرة
كنت هاخرج في مظاهرة
ضد بقية الازهار
واعلن عبيرك امير
وابني دير م الشهد
واعيش ويا الفراش
وان ما جاش الربيع
ما يهمنيش هيهمني ليه
وانتي يا زهرتى مابتدبليش
لو كنتي ثورة
كنت صرت تشي جبفارا
كنت اطمن كل خايف
كنت احرر ورد الشفايف من كرابيج السجارة
وابنى حضارة اروع م الحضارة الفرعونية
واهدي غنوة الحرية لكل سجين
واعمل دين سماوى للعاشقين
واداوى كل ليل تعبان من دلال النجوم
واصوم زى غاندي
ان مر يوم من غير ما اشوفك
ان ما عرفتشك اغزل من حروفك اجمل عبارة
لو كنتي ثورة كنت صرت تشي جيفارا
لو كنتي اغنية
كنت لحنتك ووزعتك
وغنيتك وخليتك نشيد غصون الشجر
العاشقة ضي القمر وهمس الريح
وشمس ست الحسن
لو صحيح انى عارفك لجل بوسة ولجل حضن
كنت سبتك
من زمان وكان
شوقي هدي
ما نكرشى اني باتعدي من اي لطشة بنت جامدة
وعرفت قبلك الف واحدة
بس حاسس لما شفتك ماعرفشي ليه
وكأنى لسه بابتدي
وكأنى قطة مغمضة
حبك فضا
وقلبي طير فارد جناح الفضفضة
والقضا والقدر مخنوقين وكارهينا عمي
عايزين حنيناينزل م السما
لكن قلوبنا منفضة
سيبك يا حبي من كلام الناس
الحب ماس كهربا
بين الجفن والاحلام
ياطيبه وقريبة
من صمام القلب
ومن كلام الرب
ومن سلام الروح
يا سفينة نوح
انقذيني من طوفان الهم
وافضلي معايا
وخلى غنايا
يحرق دم الحدادي
ابتعادي مش دليل ادانة
الحب بيبان ف الخيانة ساعات
والشمس لو غابت تلات
بتيجي الاربع تعتذر
تحت النظر شوقي
وفوقي كل وعد وعدتهولك
كل حرف كتبتهولك
يا كلمة مش عارف اقولك
يانجمة مش عارف اطولك
ريحينى ودوقينى من نخيلك بعض الثمر
عمري قبلك راح هدر
يا ميلادى ومهدي المنتظر
لو كنت بنت من بنات الغجر
كان زمانك خطفتي من كارمن الاضواء
ودخلتي جنة الاشواق من اوسع بيبانها
فين غصن بانها من غصن بانك
فين جنانها من جنانك
معجون سنانك
احلي الف مرة من ثغرها
ومشطك
احلي الف مرة من شعرها
وكفك هياكل صوبع سحرها بسهولة
لحظتها كارمن هتسجد وتتأكد من انك رسولة
معقولة لولا نهودك
كان اميل زولا قال اللي قاله
كان مختار نحت تمثاله
كان دانتي اطلق لخيول خياله العنان
معقولة لولا خدودك
البدر كان هيبان
الورد كان هيكون نرجسي
معقوله لو قلبك قسي
تبقي فيهااغصان كريمة
او اوطان رحيمة
متعرشة بغاب الامان
متقفلة بباب السكينة
متحوطة بلبلاب المحبه والضحكة الحميمة
معقوله لولا وجودك قي حياتي
كان هيبقي لها قيمة
لو كنت بنت من بنات الغجر
كان زماني صرت خيمة
وعملت عنك ميت فيلم سيما
لو
لو
لو
لو كنت دفتر كان زماني
صرت اشطر
وقطعتك مذاكرة
نادر جدا
نادر جدا افضل واقف ساعة حداد علي حد
نادر جدا اني اتشد لحد
احب بجد
شبه محال
كنت باشوف الحب خيال
لعب عيال وتسالي
نبت شيطاني وطالع ف القلب الخالي
شفتك واقفة جنينة ورد
نجمة سيما
تمثال اغريقي
اجمل برفان ف الدنيا ومرشوش في طريقي
وش لاول مرة باشوفه بس صديقي
اخوياشقيقي..عشيقي
دايما واقف جانبي في فرحي وضيقي
شربة مية وبلت ريقي وانا عطشان
حب لاول مرة باحسه بس حقيقي
مادنة جامع ..محراب..مأذون
فاتحة ..كتب كتاب..زفة وطرحة
بلابل فرحة
ايدك علي كتفي في صورة في برواز
انا وانتي وباب مقفول
مش معقول..دستة اطفال
فيلم هيتذاع الليلة بمناسبة نصر اكتوبر
سينا ..الطور.. عمر ومشوار
الصدفة الاجمل من الف معاد
حبك يا حبيبتي قصيدة ومكتوبة في عين الاولاد
عودي كفاية عناد وبعاد
ماذا والا هافضل واقف عمري بحاله عليكي حداد
وانا نادر جدا افضل واقف ثانية حداد علي حد
ليه
هافضل طول العمر اسأل روحي ورحك ليه
أيه معني حياتي
واحن وائن
وافضل احاسب
واجلد ذاتي
مشاعرى
آهاتي
حروف ابياتي
اصل انا طيب جدا
ساذج جدا
ابيض جدا من جوايا وعلي نيلتي
عمري ما باعرف الف ةادور
واعيش ف الدور
ياعيون مولاتي
وارجع اقول
اني بحبك
رغم بكايا
هافضل اشوفك بدر وباحلم اطوله
هافضل افكر فيكى العمر بطوله
هافضل احبك بعد مماتي
يا مغرورة بصورة اشد
بس ساعتها هاحاول اكون سباح
قد المد وقد الجزر
وقد جراح الشوق والصد
وارضى غرورك
قبل ما افكر يوم ف العوم ف بحورك
حد بجد تلاقي جنونك فيه
بس لحد ما اموت
آسف جدا
هافضل اسأل روحي ورحك ليه
بعد النهارده
بعد النهارده مش هاشوفها
الا ان شاءت ظروفها
كل فين وفين
ولا هاصطبح باحمل عنين
واجمل شفايف
واجمل ايدين
واجمل كلمة ازيك تقولها بابتسامة
بتخلي قلبي يطير حمامة للسحاب
بتخلي روحي تدوب حنين
بتخلي عمري يعيش يومين
سلطان زمانه
زى هارون الرشيد
زى الوريد بعد حقنة المورفين
زى صوفي لحظة وجد
زى خوفي لحظة اطمئنانه
يا غنوة غناها شكسبير في حلم ليلة صيف
يا لحن بتهوفن
يا لوحة من لوحات بيكاسو
لو شعري يوصف نص اللي انا حاسه
يبقي امير الشعر
لأ بجد
بعد النهارده مش هاشوفك صحيح
الا لو نزل المسيح
طب قلبي فين م الحكاية
عارفة انى كاتب نمرتك
ع المرايا والحيطان والستاير والدفاتر والكاسات
عارفة اني ياما باتكلم معاكي بالساعات
عارفة انك يا ما قلتيلي بحبك
ياما سرحتيلي شعري
ياما دلكتيلي ضهري
يا ما اكلتيني بالمعلقة
ياما اتخانقنا
ياما اتصالحنا
ياما سافرنا شرم والغردقة
امتي هتحسي علي دمك بقي
يا دنيا يا مفرقة الاحباب
يا مسبقة بالفرقة
فاكرة يا روحي وقفتي بالطرقة بالساعات
كانت عشانك
فاكرة اتصالي ف انصاص الليالي
كان تلكيك
كل شىء فيكي شيك
لبسك
ضحكتك
وقفتك
قعدتك
مشيتك
اسلوبك ف الكلام
مدة ايديكى ف السلام
كلمة (ازيك )من شفايفك فوج حمام
طاير للسما السابعة بجناحات وردي
الود ودي
يقف الزمان
والنجوم يتجمعوا
عشان يشوفوا ويسمعوا
الشعر الحقيقى
الحظ اللي حاطك في طريقي
نفسي آخده بالا حضان
نفسي اشكره بشدة
هافضل احبك حتى لما تصيري جدة
وان حد فكر يحرمني منك
هتقوم حرب ردة
بعد النهارده
هافضل اشوفك
حتي لو رفضت ظروفك كل ثانية
هافضل محافظ علي شعرة معاوية
حتي ان كنت ناوية تقطعيها بارتحالك
جايز اكون مش في بالك
وف حياتك حد تاني
حد باني
بيني وبينك الف سور
صدقيني مش غرور
لو قلتلك قلبك مش بين ضلوعك
قلبك موجود معايا
لو عايزة تشوفيه
اهلا بيكي في اي وقت
بس ماتحاوليش تقنعيه يسيبني
عارفه ليه
لأنه مش هيرضى
يكفيك سلامها
يكفيك سلامها
ومعاك رقمها
طروادة اسهل في اقتحامها
بس واضح من كلامها
لسة خارجة من قصة اليمة
وشعورها واجب احترامه
كل واحد في غرامه حر
احساسي قالك م البداية
للخلف در
بس انت ما سمعتش كلامه
حبيت تدوق
طعم الهزيمة المر
دوق
مش عايز تفوق
وتعيش الحقيقة
بتطير لفوق
وتشر شوق
لما تضحكلك ضحكة بريئة
مش رقيقة دي الرقة ذاتها
من اغنياتها العندليب بيغير
ومراياتها كاتبة فيها بالعبير
مليون ديوان
يابخت معجون السنان
والمخدة والسرير
الموظفون في الارض
عيب عليك
وانت فار واقف في غاية الانكسار
في انتظار
امضة حمار شغال موظف
او موظف شغال حمار
بيبص لك من تحت نضارته السميكة باحتقار
وهو بيخلص فطار وبيولع سجارة السوبر
كأنه بيولع سجار
وبيقولك باختصار وعينه بتطلع شرار
العش طار والفشار محتاج خنفشار
وانت بقلبك الطيب
وعقلك المحتار
مش عارف كلامه جد ولا هزار
عيب عليك
عايز يقولك
خلي النهار
يعدى
العيشة زفت يا فندى
والاسعار والجو نار
والمرتب مش مقضي
تمن الخضار
ولما باعدى ع الجزار
بافكر في الانتحار
الود ودى
ارجع بكيلو تحت باطى
للعيال في الدار
واحباطى ما لوش قرار
وباشرب السوبر استخسار
صدقني لولا الضنك والعيشة المرار
كان زمانى صرت صاحب ليك وجار
كان زمانى صرت الطف
م الطيور والزهور والمراكب في البحار
عيب عليك
احمد ربنا انك بقيت دكتور
انت في نعيم
طبعا
والدليل قاعد في العيادة بانش
شكلك وسيم
ما افتكرش
دا الشعر خف
وطلعلي كرش
والجيب منفض
كش مات
مين هيرضي م البنات بيا جوز
والحظ مادد بوز
والكبت فرقع لوز
بيصلي الفجر في الخمارة
والمصيبة ليا جارة
نهودها لوز
ودراعها موز
متجوزة راجل عجوز
يا خسارة
بركان غواية
لما تمشي في العباية السمرا
الف جمرة في دمي تولع
والاهة تطلع تحرق غابات
عاجزة اللغات عن وصف اكتئابي
يا الف حسرة يا شبابي
يا للي ضعت في المذاكرة
وتمقيق العنين
في مواد اكأب من الزنازين
وف تمني خمسة عين
لو تعود بيا السنين
ادخل آداب او تجارة
مهنة تفقع مليون مرارة
والمرتب مش مكفي تمن كتابين
ويقولولك وانت في التلاتين
اصبر شوية وحضر رسالة
والحاله تبقي مية مية
وانت بجهالة وبغباء
تسمع كلامهم
وتقول لنفسك
ناس كتير
ربك كرمهم
واكيد هاكون حد منهم
في يوم من الايام
ويفوت عليك عام بعد عام
وانت واقف مطرحك
وتشوف زمايلك يدبحك
سيف الندم
وتحس مجهودك عدم
ووجودك عدم
وتغوص في بحر الاكتئاب
وتبص خلفك
تلاقي الشباب اختفي عن مدي النظر
ما عادش باقي غير قدر
دكتاتور
بيقولك
احمد ربنا انك بقيت دكتور
Nawafezalkamar.blogspot.com
ليست هناك تعليقات:
إرسال تعليق