صالح الصعيدي

صالح الصعيدي


وريتني الويل
وسواد الليل يامحمد
اتعقدت خلاص م النسوان
بس انا غلطان
عيني الفارغة
خليتني اطلع عن طوع أهلي
ومشيت ورا جهلي
وكلام الاصحاب الملاعين
وتركت سوهاج
ورحت اتجوز م المنصورة
من نواحيكم
مش برضه انت من المنصورة
لكن كيف عينك مش خضرة
يظهر جداتك كانوا محترمين
لكن كانت شورة هباب
سنتين كاملين
وانا عايش في جحيم وعذاب
أرجع م الشغل الساعة اتنين
ألقى الهانم
لسة بتصحي من النوم
لسة بتتاوب
لسة بتاخد حمام
كوباية الشاي
عايزاني اعملها لروحي
طب انا متجوز ليه
علشان الموضوع إياه وخلاص
واللي يغيظ
وقت ما تعرف
هيزورنا ضيوف
تصحي من النجمة
وخلال ساعتين
تبقي الشقة بتبرق
زي مرايا تمام
والأكل لاماسخ ولا محروق
زي بقيت الايام
يعني يابنت الكلب
تراعي الناس
وانا واقع من قعر القفة
وانزل فيها شتيمة وضرب
لحد دراعي ما يخدل
ولساني ما يتعب
يعني عشان مانتي جميلة
وزى القشطة
وباضعف قدامك أخر الليل
حطيتي ف بطنك بطيخة صيفي
لأ دانا ادوس علي شهوتى بالجزمة
يابنت الجزمة
يابنت اللي
يابنت اللي
دا اخواتي لو طلبوا من نساوينهم
يرموا ارواحهم في البحر
هيقولوا آمين من غير تفكير
وانتي
زي المعجونة بمية شياطين
ماشية تمللي عكس عكاس
اتعدلي يابنت الناس
خلي المركب تمشي
وانا اشيلك ف عيوني
واغطيكي برمشي
واقيدلك كل صوابعي العشرة شموع
يوم واتنين
يتكررنفس الموضوع
سنتين كاملين
وانا باخد في سناني
لحد ماجاني الضغط
وانا لسة يادوب خمسة وتلاتين
اتعبهم ف الاول
ترتاح بعدين
فعلا ناقصين
عقل ودين
دكتورة الجامعة
زي اللي بتغسل مواعين
مجانين
اوعي تقدم انت السبت
مش هتلاقي لاحد ولااتنين
أغرب شيء في الدنيا
اللي انت خاطبها
مش هي اللي بتبقي مراتك خالص
فجأة العصفورة
تقلب تبقي غراب البين
والبوس يتحول لروتين مفروض
بعد ما خلفت الواد محمود
حبيت أيامي
مابقيتش باخاف
م التجاعيد اللي ف وشى
والشيب اللي ف راسي
ولامن كرشي المتدلدل قدامي
صالح اللي بيتكلم وياك دلوقت
غير صالح خالص
أنا كنت اغشم م التور
أيوة صحيح دكتور
لكن كان كل كلامي نطيح
لكن بعد ما جيت المنصورة
واتربيت من أول وجديد
علي أيد بنت الكلب
اتدردحت كتير
وبقيت بالبس جينز وكوتشات
واعرف الاغي بنات
واكتب ع الهوا مواضيع تعبير
انا دلوقت غريب عن روحي
وطموحي
ارجع زى ماكنت زمان
إنسان
طيب وغشيم
واتغاشم ع الغش وع الكدب
وع الأحزان
نفسي ارجع زي ما كنت زمان إنسان

امرأة في الخمسين

امرأة في الخمسين

1

الخصلة البيضة حمامة
واقفة علي غصن الخمسين
والهالة السودا تحت العين
تعلب راقد ف جنينة أحزانها
والتجاعيد تعابين
عمالة بتزحف علي عطر آذار
مشهد أول
خارجي نهار
مزيكا رومانسي
شهدوخالد خارجين م الجامعة
بيشاوروا لتاكسي
الشمس بتضحك ضحكة عريضة
والعصافير بتزقزق
والامطار
غاسلة الجو
والاسفلت
وإزاز العربيات
والليل قاعد على شط النيل
يسمع فيروز ونجاة
وصوابع بتداري علي الشمع
قطع

2
داخلي نهار
جوه مطار
شنطة دميمة بتسحب إيد خالد
لقطة كلوز آب علي الايد
نفس الايد الكانت بتداري علي الشمع
قطع

3
الشمس مريضة
والعصافير مشنوقة ف بوستر على حيطة
والمزيكا بتهدي وتهدي وتتلاشي
ياعبيطة
مين يرفض باشا
كامل من مجاميعه
ويبيع القلب ربيعه
ويخون احلامه
وطيوره يناموا
تصحي الخفافيش
ماحنا لابد نعيش
زي الناس ماهي عايشة ياشهد
ماذا وإلا الدنيا ما تمشيش
كل الناس مجاريح
والذكري كما الريح
بتهز الشيش
وستاير شاحبه
غرقانة نزيف
بيتك
علشان خاطر سارة وسيف
ماشي ياماما
أحمد راجع نص الليل سكران
لحم النار بردان
والرعد مخيف
والاباجوره انكسرت
والشبورة
طابقة علي أنفاس الزرع
قطع
4

وتمر الاعوام
زي البلدوزر
تطحن أحجار الرغبة
ورد الاحلام
يوم عادي يشبه لبقيت الايام
نفس العيشة الضنك
والناس ف البنك
من كتر كلامهم بالارقام
بقوا ارقام
بقوا اجسام منزوعة الاعصاب
وبيوت ما لهاش شبابيك
فجأة بيدخل م الباب
شبيك لبيك
تطرح اعشاب ع السيراميك
وسنابل وجداول
والقلب الاخرس مذهول
مش معقول
خالد
إزيك
أخبارك؟؟
ماتغيرتش خالص
وانتي كمان
لسة جميلة ياشهد زى زمان
مبسوطة؟؟
طبعا
جدا.. جدا..جدا..
أنا أكتر إنسانة سعيدة
جوزي ملاك
لكن...؟؟؟؟
محتاجة اتكلم وياك
آدي تلفوني
وادي عنوان الشقة بتاعتي
مزيكا
سامبا وفلامنكو وكاريوكا
يارب سامحنى
مش ها قدر اتوب
وانا لسه يادوب
بادخل دنيا
هاخرج منها ازاي
غصبن عنك
مش بمزاجك
فجأة المزيكا بتهدي وتهدي وتتلاشى
والقلب بين فكي الكماشة
والقطر بيمشي
والاحلام الراكبة
بتنزل واحدة ورا التانية
والقطر بيفضي
والدنيا بتفضي
حتي انتي ياماما نزلتي وسبتيني
أيه اللي باقيلى
غير الشعرات البيض والتجاعيد والدمع
قطع

5
داخلي نهار
شهدوطارق-صاحب جوزها الروح بالروح-
واقفين دلوقتى علي البار
بيعبوا الماضي ف كاس
والحاضر تلج
بيدوب علي نار شفايفهم
والحب لوحده شايفهم
بعيونه العاميه
كل الاشياء السامية
منحطة ف بعض الأحايين

6

جامعة كبيرة ف لندن
جسيكا
أستاذة علم المصريات
واقفة بتشرح
وبتحضن كل مسلة وتمثال
وكلامها بيزرع ف قلوب الطلبة جناين
جسيكا بتفتح باب الشقة
طارق جوزها
عريان
وتخيل مع مين؟؟
كل العالم خاين ياعطيل
وياهاملت ويا لير
آه ......لو نهر النيل مليان شمبانيا
بدل المية
كان داوي قلوبنا الموجوعة
قطع

7

جامعة كبيرة ف مصر
أحمد
- في الخمسين لكن سينمائي وعنده كاريزما-
بعد ما بيخلص شرح
بتقرب فاتن
بنوتة تخلى الارض تبطل دوران حوالين الشمس
وتدور حواليها
وبصوت بيدغدغ في الاعصاب
ممكن أستفسر عن حاجة يا دكتور
وبنظرة ديب وبلا مبالاة
تعاليلى المكتب
عين فاتن تلمع
كل الطلاب فاهمين
وبحزن شديد
أحمد شوقي
بيولع في قصيدته
قطع


8

بيت العيلة
بيت جدرانه اللبلاب
والسقف سحاب
حاطط علي فخده العود
وبيعزف ألحان سيد درويش
ونزار موجود
وبهاء طاهر موجود
وكمان وردة وكارم محمود
وابوتمام بيوشوش لوركا
بيت العيلة
فردوس مفقود
باب واحد ومنازل
منفي جميل
شهد بترقص مع طارق
وردة بتسأل
ليه العمر بخيل
ليه بيحقق أحلامنا ف مشهد
بعده بتنزل كلمة إند
إند
إند
end

الي د.خلف سالم

عصفور الجبل

مهداه إلي صديقي الجميل :خلف سالم


طيب قوي وع الفطرة
كالشمس تضحك من خلف شيش المطرة
كالقطرة
ومرهم وشريط مضاد في كف ست عجوزة
خارجه من عيادته
تبتسم وتقول
دمه أخف م الشربات
وتدعيله أطيب الدعوات
طيب قوي
زي كيس شعر البنات
والجيلاتى والعنب البناتي
والاغنيات والمسلسلات في فترة التسعينات
زى لعب الكورة فترة القيلولة
زى كل الذكريات الجميلة في الطفولة
وكل الحاجات اللي كنا بناخد عليها سيئات
شيك في بهدلته
ولمعة عينه خلف نضارته
فيها نبالة ابن ذوات
وفيها صلابة الشمروخ
وفيها كبرياء وشموخ النخيل
وفيهارقة وحزن طمي النيل
وفيها لؤم الفلاحين
وفيها طموح كل دين للا نتشار
وفيها ديك بيدن ع الجدار الطين
ورغبة صعيدي في أخد التار م النجاح
طيب قوي
وضحكته فطار الصباح
والشاي بالحليب
وعروسة بتنشر فى الغسيل الابيض علي حبال الحبيب
ومشيته فيها إحباط الأمل
زى الجمل شايل حمولة تقيلة لكنه راضي
وحاضن هجير الوادي
وسابق خطاوى الحادي
وبيسابق نسور الجبل
لاجل يوصل بلاد الورد
ونهر الامنيات
وأكيد هيوصل مادام مآمن بحلمه
ايمان البلابل بالاغنيات

قصائد حب

قصائد حب

العشق جريء

لو إني عرفت عيونك
قبل الدمع مايروي شجرها أنين
قبل الحزن مايبقي قدرها
ويطفي قمرها الكان
بينور مليون ملكوت ومازال
قبل الدبلة ف إيدك ماتصير سجان
والشقة تصير زنزانة
شبر ف شبرين
قبل حنينا وشوقنا
مايبقي خيانة
إهانة
لورقة ف دفتر مأذون بيطلع في الروح
قبل الضحكة الباهتة
الباردة
النظرة الساكتة
الشاردة
يا م شفايف وردة ف دوح
ماتبقي طريقتك في التفكير
والتعبير بالمسموح والممنوع
قبل ما يدلق جوزك
كل عبير أحلامك
أيامك
قدامك
علي فستانك الابيض
كما فنجان القهوة السادة
كما منديل دايب في دموع
لو إني عرفتك
قبل ما كل معاد
ياحبيبتى باشوفك فيه
مايكون مسك ختام المواعيد
وتعيدي تزيدي ف نفس الموال
زى الاطفال
زي البنت بنوت
لازم انساك
لازم تنسانى
ولسانك بيقطع ف لساني
وانا غرقان ف بحور الخد
النهد
الشعر
الضهر
الجيد
الحقني يارب باموت
باقب واغوص بجنون
واطلع بفصوص مرجان وياقوت
واقب واغوص
واطلع بنصوص
من أيام سيدنا الخضر ولوط
ويونس اشوفه ف بطن الحوت
واقب واغوص
مش ينفع خالص
من فضلك يامحمد شيل إيدك
الناس بيبصوا علينا يا مجنون
طب إهدي شوية
نتفرج ع الفيلم شوية
للمرة الالف باقولك بطل بوس
هامشي بجد
وانا اقب واغوص
حبك إدماني وأدماني وعشاني
قلبك مخلوق مخصوص
حبك مارد محبوس
كان فين
وطلعلي منين
مش عارف
مش فاكر
يمكن من دفتر شعر قديم
مش فاكر إني كتبته بس بتاعي
يمكن من ندبة مكان حقنة تطعيم
ف دراعي
يمكن من بوستر
متعلق علي جدران احلامي
يمكن من رنات المحمول
اللي حاططها عشانك إنتي وخايف
إني أقول
يمكن من كل قصايدي
اللي كاتبها عشانك انتي وخايف اني اقول
يمكن من ذكري حبيبة
باحكيلك عنها
وقاصدك انتي
وخايف اني اقول
ممكن اكون ياحبيبتي خجول
بس العشق جريء




























رسائل حب

1

إزيك
وازي الضحكة اللى ف صوتك وف عينك
الضحكة اللي ترد الروح
الضحكة اللي بتحكى كل اللي مابينى وبينك
من غير ما تبوح
الضحكة اللي بتفرش مشواري واشعاري آمال
الضحكة اللي بتفضح وتداري الشوق بدلال
الضحكة الاغنية
الموال
اللحن اللي يعيش ف قلوب اجيال
إزيك
وازي
براءتك وجراءتك وشقاوتك وطعامتك
وحشاني
ازي الايد اللي المسها بتطرحلي اغاني



2
اليوم بيعدي عليكى ازاي في الطور
نفسي اسمع منك كل التفاصيل بالتفصيل
نفسي اعرف بيقولك ايه النجم السهران
والليل بالليل
نفسي الغي ملامحي واكونك
اونسمة ف كونك
اونقطة ف نونك
نفسي اعقل وأكون مجنونك

3
عايز اقولك سر خطير ويهمك
لو كنت أهمك
ادعيلي افوق من حلمك من غير صدمات
دنا قلبي حبيبك وصديقك واخوكي ومن دمك
ترضيله يموت من فقد الثقة بالذات

4
هافضل طول العمر اسأل
روحي وروحك ليه


5

هاكتب بحروف المعاناه
عن كل الرنات الاولي
عن كل اللحظات الاولي
عن كل كلامك عن نفسك ونا باسمع بخشوع
زي ماكون باسمع قرآن من احلي شفايف
عن صوتك يملاني امان ونا خايف
هاكتب بحروف المعاناه
عن بحري اللي بيغرق وشاددنى معاه


6
كان نفسي اقولك شكرا علي حبك ليا سنين
مش طايق اقولك
شكرا علي حبك ليا دقايق

7
افرح ياقلبي
ياللي عامل زي القلوب الطيبة بتاعة زمان
تقدر تقوللي
مين اللي فرحوا فى الهوى وارتاحوا
انت واحد من آلاف المجروحين م الحنين
واللي شاف جرح غيره
هانت جراحه
افرح ياقلبي
وانسي اللى فات
هو كده حب البنات
هو كده طبع البنات
اعقل ياقلبي
وامسح صورها
ايميلها
وامسح من غير ما تبكي اوتئن
نمرة التلفون
واوعي تضعف او تحن لما تقابلها

البنت دي بتصعب عليا

البنت دي بتصعب عليا

كل بنت وليها داخلة
واحدة صعبة
واحدة سهلة
واحدة عايشة الدور شوية
والبنت دي بتصعب عليا
قلتهالك وماكانش عاجبك
وغلطت فيها وغلطت فيا
البنت دي عشان تحبك
حسسها إنك خجول
وتغرق
في شبر مية
وبلاش تغنى
وبلاش تحور
وبلاش تدور
في ماضيها عن خطية
البنت دي
جراحها أكبر
من شمس وقت المغربية
وعايزة حد
يحس بيها
ويحب فيها
روحها الندية
ويبقي ليها
إيد وفية
البنت دي بتصعب عليا
قلتهالك وماكانش عاجبك
وغلطت فيها وغلطت فيا











وبلاش تفكر

وبلاش تفكر
فيها أكترم اللزوم
وبلاش تعاتب
وبلاش تلوم
حد كان
صاحبك في يوم
وف لحظة خان
الدنيا آه
مالهاش أمان
وبتقفل ساعات
كل البيبان
بس لما الشمس تظهر
بلاش تدور ع الغيوم
وبلاش تفكر
فيها أكتر م اللزوم
روق يافندي
عمك بشندي
كان لسة عندي
وشاف معايا فيلم هندي
وقعدنا ناخد
وقعدنا ندي
وقعدنا ناكل في مفشر
وقاللي ليه الواحد يكشر
ويروح يعسكر عند الهموم
وبلاش تفكر
فيهااكتر م اللزوم
شايلي طاجن ستك ستيتة
وقاعدلي تبكى عندحيطة
الدنيا مش قرنين شطيطة
الدنيا أبسط من بسيطة
لو تأخر كل دمعة لتاني يوم
وبلاش تفكر فيها اكتر م اللزوم

خليكى فاكرة

خليكى فاكرة
لاجل غلطة مش قاصدها
إيد ماددها
وانتي رافضة تسلمى
علي قلب كنتي نور عنيه
خليكي فاكرة
انى اعتذرت ألف اعتذار
وبكيت دموع تملا بحار
وانتي بتاخدي قرار بعدنا
من غير ما حتي تقولي ليه
خليكي فاكرة
لو قابلتك في الطريق
لا هحنلك ولا اقول ياريت
واقطع ما بينا الف خيط
واقول لقلبي خلاف بسيط
واضحك عليه
خليكي فاكرة
مش كل يوم
هتقابلي حد
بيحب جد
الدنيا برد ومحتاجين
قلب طيب ندفي بيه
خليكى فاكرة

الي د.جلال امين

إلي د.جلال أمين
رحيق العمر

عمرك رحيق زهرة نابتة
فوق كف شمس حنونة
وقلبك مدينة
أرصفتهاطيبة
وكل ناسها غلابة
وقلمك بيحيى الكتابة
من قبور الافتعال
واحتلال عديمي الموهبة
للورق الابيض المسكين
دكتور جلال امين
خلي العيال تلعب بعيد
ويشوفلهم صنعة تانية
كل ثانية
يطلع كويتب
فاضي من جواه
وواخد في روحه قلم
والقلم يقول الله
رغم إنه مش فاهم كلامه
والناس يناموا
طول المقال
ويصحوا يسقفوا
ويقولوا اكيد
احنا اللي مش فاهمين اكيد
الراجل علامه أعلي مننا
وبيخاطب الاجيال اللي جايه بعدنا
والمقال مليان رموز
العجوز
رمز الخليفة
والشذوذ
رمز أفعاله الغير شريفة
وصوت فيروز
رمز شوق المسجونين
لنسمة الحرية
لكن عقولنا صارت غبية
من كتر اكل الفول
وناقد يصول
وناقد يجول
وناقد يقول
الجهبذ تنبأباللي احنا فيه من قرون
والناس تصدق
وتترحم علي زمن العقول العبقرية
ويقلد جهول
مليون جهول
وتموت الكتابة الطيبة
تحت حافر خيول الافتعال
وييجي يحييها البارودي وشوقي
وييجي يحييها دكتور جلال


كل حرف بتكتبه
حافظه عن ظهر حب
وباقول يارب
تكتب كتاب كل يوم
لاجل انام
فوق النجوم
وانسى الهموم
واقراه
ياه
نفس الكلام كان نفسي اقوله
وكأن نبضك هو نبضي
وكأن قلمك هورفضي
واحتجاجي
هو حلمي
يبقى تاجي
انى مصري
مش مداسى
وكأن كتبك
هي ناسى وأصدقائي
وكأن عمرك
وردة في جيوب السواقي
مية في الارض الشراقي
احنا التلامذة
وانت استاذ ابتدائي
صاحب رسالة
مهما نكبر
في قلوبنا ساكن للأبد
وهنحكي عنك
لكل طفل بيتولد
من غير مانقصد
واحنا بنحبك نسينا
وحبينا معاك البلد

ثورة يناير ماتحاولش تفهم

ثورة يناير..ماتحاولش تفهم


1
يحلو لي كثيرا أن أفهم ما يحدث في مجتمعنا المصري من خلال السينما ..بأفلامها الهامة والتافهة علي حد سواء..وما يحدث الآن يدعو للإرتباك والحيرة..ومن أكثر المشاعر ألما أن يجد الانسان نفسه عاجزا عن الفهم..الفهم الذي يجعلك تتخذ موقفا
ينشرح له صدرك ويطمئن له قلبك ..ومن ثم تستطيع مواصلة حياتك هاديء البال..والسؤال الذي أرقني كثيرا
هل الفيس بوك هو سبب هذه الثورة؟؟
نعود إلي السينما
في عقد التمانينات وأوائل التسعينات من القرن الماضي كانت هناك حالة ركود شديد في السينما..فالافلام المنتجة لاتكاد تتخطى العشرة أفلام..وبحلول عام 1997 تم عرض فيلم فقير إنتاجياوفنيا دون أن تسبقه أي دعاية تذكروحقق الفيلم ايرادات خيالية.. الفيلم هو أسماعيلية رايح جاي بطولة محمد فؤاد ومحمد هنيدي..
والسؤال مالذي جعل الشباب المصري ينزل الي السينما في مختلف الاقاليم في نفس التوقيت لكى يشاهد هذا الفيلم..رغم عدم وجود فيس بوك ولا تويتر ولا حتي موبايلات..ومن بعد هذا الفيلم بدأت موجة أفلام الشباب وكوميديا الشباب والنجوم الشباب ..وانتعشت السينما المصرية علي الاقل علي مستوي الصناعةوان لم يحدث انتعاش علي مستوي الجودة الفنية لاسباب لاداعي لذكرها الان.. ومن بعد هذا الفيلم بدأنا نسمع عن الملايين التي يتقاضاها النجوم من مطربين وممثلين ونجوم كرة..ومن بعد هذا الفيلم بدأنا نسمع عن شرم الشيخ ومارينا بصورة ملحوظة في الشارع المصري..صناع الفيلم لم يتوقعوا أبدا ان يحقق هذا النجاح المعجز الذي تخطى أحلامهم..أذن كانت هناك تراكمات في باطن المجتمع لم يلحظها احد ثم فجأة ظهرت بهذه الصورة..كانت هناك تنمية اقتصادية تتم وفجأة أدت الي المزيد من التنمية..العدد الغفير الذي نزل يشاهد الفيلم دفع ثمن التذكرة عن طيب خاطرمقابل ان يضحك ضحكا جديدا من ممثلين أقرب الي ملامحه في هذه الفترة..محمد هنيدي وفؤاد..هذان النجمان ذوي ملامح شريحةالطبقة الوسطى الدنيا.. اردت ان اقول باختصار..ان اي مجتمع لكي يستمر لابد ان تتجدد دماؤه كل فترة..وان اللاوعي الجمعي يتواصل دائما سواء وجد الفيس بوك اولم يوجد..
2
هل هذا معناه انك تنكر دور الفيس بوك؟؟
بالطبع للفيس بوك دور خطير..العالم بعد ان عرف الزراعة غيره قبلها..فالزراعة هي التى حولت القبائل الي دول..والعالم بعد الثورة الصناعية غيره قبلها..الثورة الصناعية هي التى ادت الي
-ان تصبح الدولة كيانا شديد التعقيد فهي التى خلقت الرأسمالية الحديثة وظهور الحركات العمالية وفكرة النقابات وبالتالي فكرة البرلمانات والدساتير بمعناها الحديث ايضا..
- الاستعمار للحصول علي مواد خام وايجاد اسواق لتصريف المنتجات
3

العالم بعد ثورة الاتصالات
ستنتهي فكرة الحاكم الدكتاتور..لماذا؟؟لأن المعلومات اصبحت متاحة للجميع ولم تعد حكرا علي طبقة معينة..فالدكتاتور لكي يوجد لابد ان يوجد مجتمع مغلق يستطيع السيطرة عليه من خلال حكومته بمختلف وزاراتها فهو يستطيع التحكم في المعلومات التي يريد لشعبه الايعرف غيرها ويعبد الله بالطريقة التي لاتهدد عرشه
وهكذا..تأملوا مثلا العلاقة بين المدرس والطلبة والاب والابن والطبيب والمريض قبل ثورة الاتصالات وبعدها..كانت علاقة دكتاتورية بكل معني الكلمة ..
فهناك الطرف الذي يعرف مصلحة الطرف الاخر أكثر منه..الان بالمعلومات المتاحة يستطيع الطالب ان يتفوق على الاستاذ ان توافرت لديه الهمة ويستطيع المريض ان يعرف معلومات عن مرضه لايعرفها طبيبه ..وهكذا..


4

مستقبل رجل الدين

قبل ثورة المعلومات كان رجل الدين عبارة عن مؤسسة ..العاقرتذهب إليه وتستشيره بدلا من اسنشارة طبيب..وعندما يقوم زلزال يلجأالناس إليه للفهم بدلا من اللجوء إلي عالم جيولوجيا..وعندما تقوم حرب ينتظر الناس رأيه بدلامن محلل سياسي..الوضع الآن اختلف..في الفترة القادمة سيقتصر دور رجل الدين علي التوجيه الروحانى والاخلاقي ..ومابعد ذلك فأنتم أعلم بشئون دنياكم..
5

الاخوان المسلمون الي اين؟؟
ستتفكك جماعة الاخوان المسلمون بالشكل التي توجد عليه الآن..إذ ان فكرة الزعيم الملهم قد تلاشت الي غير رجعة ولم يعد لها محل من الاعراب ..انتهت فكرة السمع والطاعة ..القرآن موجود ومئات التفاسير موجودة ..ويستطيع المسلم ان يختار التفسير الذي يطمئن اليه..الاختلاف رحمة..
6

رئيس الدولة القادم؟؟
موظف وليس زعيما ملهما..يخضع لقانون الدولة كغيره من المواطنين..الممارس العام الشاطر لايشترط ان يفهم في كل التخصصات..العبقرية ان يعرف كيف يحيل الحالة للإخصائى القادر علي التعامل معها..

7
سأل احمد زويل مهاتير محمد
كيف جعلت ماليزيا تتقدم؟؟
أجاب: جعلت الشعب الماليزى يفكر في المستقبل

8

كيف تحدث الثورات؟؟
علي عكس ما يعتقد الكثيرون لكي تحدث ثورة لابد ان يسبقها حراك اقتصادي وحراك ثقافي والذي يغري المجتمع بالمزيد..

في الخمس سنوات الاخيرة شهدت مصر حراكا ثقافيا متميزا
فالشباب عادوا الي القراءة وحققت الكثير من الكتب رواجا هائلا وزاد عدد دور النشر وحفلات التوقيع وزاد ت عدد جرائد المعارضة وبرامج التوك شو والقنوات الخاصة وزاد عدد المشتركين في النت وزاد الاقبال علي السينما مما ادي الي افتتاح المزيد من دور العرض وكثر عدد الافلام التي تنتقد اداء الحكومة

وعلي المستوي الاقتصادي تحسنت احوال معيشة المصريين عن ذي قبل وزاد عدد المستشفيات الخاصة التي تتقاضي اموالا طائلة ومع ذلك تلقي اقبالا شديدا وبالمثل المدارس الخاصة وانتشرت الدروس الخصوصية في الجامعة رغم التكلفة المادية العالية وزاد عدد مالكي السلع المعمرة من تلفزيونات وثلاجات وتكييفات واجهزة كمبيوترولكن في نفس الوقت كانت تزداد الفجوة بين الاغنياء والفقراء اتساعا رهيبا
والغني والفقر موضوع نسبي
فحين تملك محمولا ب100جنيه بينما يملك زميلك اخر ب5000 جنيه ستشعر حتما بالالم..
نعم تحسنت الاحوال ولكن بالمهانة وبالفهلوة وبالرشوة وبالشحططة في بلاد الخليج والغرب والغرق في العبارات
نعم تحسنت الاحوال ولكن المدرس كان يعمل جرسونا في كافيه والطبيب يعمل في مستوصف يملكه تاجر فاكهة وخريج الحقوق يعمل صبي نقاش وخريج التجارة يفتتح محل موبايلات بينما مذيع يأخذ عن الحلقة 200 الف جنيه وممثل يأخذ عن اعلان 13مليون جنيه وممثلة تأخذ مليون جنيه عن كل حلقة من مسلسل تافه

نعم كان هناك حراك علي كل المستويات ولكن كان هناك ظلم فادح وسرقة لأموال الدولة عيني عينك وضرائب تكادتفرض علي الهواء الذي نتنفسه وفساد ازكمت رائحته انف الشيطان نفسه...

9
ماذا تعني السياسة؟؟ للأسف مازال الكثير من الشعب المصري يصدر حكمه علي اي رئيس من خلال ماكتب من مذكرات او ماكتبه القريبون منه ..والتقييم الصحيح لأي سياسي هو ان تسأل
مالذي حدث للتعليم في عهده؟
مالذي حدث للصحة؟؟
ماهي القيم الاخلاقية التي سادت؟
مانوع الاغاني التي سادت ؟؟وهل كان يعمل علي تدعيم الاغاني التي ترقي بالشعب ام لا؟
كيف تعامل الاقليات ؟
ماعدد الافلام المهمة التي انتجت في عهده؟
ماهي وسيلة الحراك الاجتماعي ؟هل التعليم والعمل المنتج الشريف ام الكوسة والمحسوبية والفهلوة واللعب بالبيضة والحجر؟؟
كيف يعامل الشعب عندما يسافر الي دولة اخري؟
ماهي الكتب التي كتبت وستبقي للأجيال القادمة ؟؟وهل اهتم بهذه الكتب ام حاربها ام لم يهتم بها؟؟وكيف كان يعامل المفكرين والعلماء المعاصرين له؟
ومن حسن الحظ ان هذه الاسئلة اجابتها واضحة ولا تعتمد علي نوع النبيذ الذي يحتسيه كل من يكتب لنا مذكرات سياسية تعمل علي تضليل الحاضر كما شوه كاتبوها الماضي من قبل...