سامحيني

سامحيني

سامحيني وخلي في قلبك ذرة قلب
دانا من كتر الاحساس بالذنب
كاره ذاتي
تايه في دروب احباطي
مصلوب علي ليل كل مكان رحناه
لحظة شوق او لحظة طيش
سامحيني
مش عارف اعيش
من غيرك ياحبيبتي حياتي
ولا عارف اموت
ولا عارف اهاجر
من المي وندمي وشوقي المكبوت
ولاعارف اصلي في محرابك ونا خاطي
وكمان مش عايز اتوب
اعمل ايه
ان كانت حسناتي
خدودك شايفاها ذنوب
وشفايفك رافضة دخول جناتي
وعايشة في نارك
سامحيني
سامحي العصفور
ان ساب اشجاره وطار لمنارك
سامحي القلب ان بطل دق
ودار في مدارك
سامحينى ومش آسف
عن ادماني الصيد في بحارك
واوعد موجك
هافضل مغرور وعنيد
وهاسافر ضد الريح بجناح مكسور لبعيد
واعرف اخبارك من صوتك
من عطرك
من نظرة عين
من لمسة ايد
من جرح قصيد
واطلق حبك في وريد المجهول
علشان العمر يطول
وافضل طول حزنى سعيد

2

من يوم ما عرفتك
والشوق مش راحم اعصابي
بيخبط علي بابي في عز الليل
ويصحيني
يفضل يحكيلي في مواويل
عن ضحكة ضحكتيها
عن كلمة وقلتيها
عن آخر مرة قابلتك فيها
وبكرة ها قابلك امتي وفين
عن صوت بينسي سنين الحرمان حرمانها
عن نظرة عين
انا مخلوق في الدنيا عشانها
ومخلوقة عشانى
مهما اكتب في اغاني
عمري مااوفي الدين لشفايفك
تيجي ازاي
ونا شايفك واحشاني
ونا واخدك بالحضن
باحضن الايام
وباسامح كل الحزن اللي جرحني وانا جاي
جايلك ياحبيبتي

3

من يوم ما عرفت الركن الهادي اللي في حضنك
ونا قاعد فيه طول ايام الشوق
باسهر
باشرب
باسكر
بارقص
وباطير مع دخان حجر التفاح لنجومك فوق
واقرالها نشيد انشادي
بافرح جدا
زي اللي بياخد تار من كل جراح الماضي
مش عايز شىء تاني من الدنيا
مش باكي عليها
دا كفاية اللحظة اللي باضمك فيها
واطير للشمس وشجر التوت في حنانك
واهرب من سجن اليأس
الجرح
الموت
واعب ويا فراش بستانك العاب طفولية
باعشق قضبانك
امرك
نهيك
ظلمك
ياحورية
حبك اغنية
ساكنة قصادي
ساكنة سهادي
ساكنة حروفي وسمعي وشوفي
وخوفي واطمئناني
تاهت الحاني في صوتك وجوابه وقراره
تاهت الحان بتهوفن وموزاروالاخوين رحباني
انا محتار
لما ها قابلك بكرة هاقولك ايه
وانت اجمل من شعر نزار قباني
اجمل من كل افلام اللى دخلناها السيما
من غير مانشوفها


4

شعرك اغنية ليلي
وصوتك قنديلي في سرداب الخوف من بكرة
باكره انى اقول
اني باحبك
مش اخلاقي
عايز اقول كلمة اكبر واجمل مش لاقي
كلمة تغنيها زهور وعطور وسواقي ورايا
سامحيني
سامحي الشعر ان قصر
ان ما عرفش يكسر اوزانه
ويشق لسحرك بحر اغانى
سامحي يسوع
ان ما عرفش يموت مصلوب علشانك تاني
سامحي دموع سابقاني
لو ايدك تترك انهار الدنيا وتشرب من كفي
مش حامل هم هموم
طول مانتي في صفي
مش محتاج لنجوم الليل
طول مانتي دليلي

5

عارفك من ايام وحاسسها سنين
عارفك من احلام كنت باشوفك فيها كتير
عاشقك قبل الورد ما يبقي له عبير
عاشقك قبل ماكون وتكوني
والاغرب كان تلفوني
حافظ نمرة تلفونك
ومسميها الحب الآتي
اجمل يوم وانا خارج من ظلماتي لنورك
وبآمن بعيونك وغرورك
وباسافر في بحورك وهديلك
لابعد موال
وبلاقي اجابة لكل سؤال
حير قلب
وحير نجمة
وحير ليل
اجمل يوم لما اسرق كاس عناب من خد بخيل
لما اسرق من ورده برفاني
لما اسرق من شعرك ليلة قدر واتوب
سامحيني
انا مغلوب
علي امري وخمري وادماني

6

مشتاقلك موت
مشتاق لمعاد من مواعيدك
مشتاق للجنة في ايدك
مشتاق لثوانى اشوفك فيها
وأسلم بالعين علي عينك
اهرب فين
وحنينك يااميرتي مالوش جدران
لو غبتي يومين
الضحكة بتاعتك مش غايبة
دايما حاضرانى وحاضنانى
خايف اكون موهوم بسراب كداب
وآمال دايبة
لو رن التلفون
باجري عليه باعصاب سايبة
وادعي يارب يكون
جبل التلج اللي ما بيني وبينك داب
وارجع مجروح
مش لاقي طريق
ولاباب مفتوح
واشكي لمين
وماليش غير حضنك في الدنيا صديق للروح
ولاحد
عمري ما كنت ضعيف الي هذا الحد
ولا مجنون
يام الضحكة الاخطر من افيون
ملعون اللي يحبك الي يوم الدين وشهيد
مش بالايد كل اللي حاصل لي
يخرب بيتك دانت تحل لي
من علي حبل الشنق
وتستاهلي الحرق
بنار اشعاري
لو تلفونك داري بناري
كان رن لوحده عليا
كان حن
كان طمن قلبي الخايف
لو يعرف اني مريض
وشفايفي محتاجة لزرع شفايف
كان جاب لي شفايفك يا حبيبتى هدية